Pro sos 200 annos dae sa nàschida de s’archeòlogu chi at agatadu sas ruinas de Troja, dae eris 9 de maju 2022 Aristanis at a ospitare sa de 19 Cunferèntzias internatzionales de s’Egeu.
S’eventu, intituladu “Camminando sulle orme del pioniere dell’archeologia egea”, est organizadu dae su Tzentru internatzionale pro sa Chirca relativa a sas Tziviltades egeas “Pierre Carlier”, dae s’Assessoradu a sa Cultura de su Comune de Aristanis, dae sa Fondazione Oristano e dae s’Universidade de sos Istùdios de Tàtari e at a durare finas a domìniga 15 de maju.
Heinrich Schliemann, chi faghet sos 200 annos dae sa nàschida, est contadu comente su chi at fundadu s’archeologia greca e pro more suo sunt essidas a campu sa tzitade de Troja e sa tziviltade mitzenea.
Sa Cunferèntzia internatzionale de s’Egeu at a esaminare su chi est essidu dae su traballu fatu in Troja, Micene, Tirinto e Orcomeno. Pro cumprèndere mègius sos avantzamentos fatos dae sas primas esploratziones de Schliemann, s’ant a analizare puntos de vista diversos comente sa topografia e s’ambiente, s’architetura, sa produtzione artìstica e artesanale, s’organizatzione de sa sotziedade, sas pràticas religiosas, sos mezos de sustentamentu e comente si riforniant de provistas e finas ite b’at in sos libros in custu argumentu. Custa manera de operare fiat importante meda in su traballu de Schliemann e si nd’at a faeddare in sa letzione printzipale, analizende finas comente est cambiada sa chirca iscientìfica in unu sèculu e mesu.
Sas letziones, a mangianu e a sero, s’ant a fàghere in sa sala cunferèntzias de s’Hospitalis Sancti Antoni.
A sa cunferèntzia bi partètzipant dotzentes universitàrios, istudiosos e archeòlogos chi benint dae totu su mundu e chi ant a faeddare de sas riflessiones issoro in contu de sa tziviltade egea.
(GF.P.)
