Provìntzia de Aristanis (annualidade 2005)
Sa publicatzione tenet comente argumentu sas letziones de su cursu de formatzione lege 482/1999 – annualidade 2005, fatu pro sos dipendentes de sa Provìntzia de Aristanis. Cun custu traballu sa Provìntzia at mantènnidu s’impignu istitutzionale e, paris, at donadu valore a sa polìtica linguìstica chi at programmadu dae s’incomintzu de su servìtziu de s’Ufìtziu de sa Limba e sa Cultura Sarda.
Fainas pro s’impreu de sardu in s’Amministratzione pùblica est un’istrumentu didàticu pro sos dipendentes e pro sos tzitadinos chi s’interessant a s’istùdiu de su sardu. Sos iscritos de sos professores chi ant fatu sas letziones – dot.ra Gianfranca Piras, dot, Cristiano Becciu e dot. Michele Ladu – tratant de temas atuales in sa dibata subra sa limba nostra: de istandardizatzione, de limbàgiu amministrativu, de ortografia, pro chi totus potzamus impreare su sardu fintzas in s’iscritu.
Sas tabellas, sas cartas geogràficas e sos riferimentos bibliogràficos impreados dae sos autores agiudant a cumprèndere mègius sos argumentos. Non mancant riferimentos a internet e a sos sitos de sa Comunidade Europea, su cunfrontu cun àteras limbas istràngias e cun sas variedades de su sardu. Su traballu est cumpletadu dae ischedas didàticas cun esertzìtzios e règulas pro s’impreu de su sardu in s’iscritura.
Podides pedire su libru compilende su mòdulu chi agatades INOGHE e mandende.lu a s'indiritzu limbasarda@provincia.or.it.
