Sa Sartìglia de Aristanis e sa Ensortilla chi si faghet in s’ìsula ispagnola de Minorca tenent tantos puntos assimigiantes: in ambas duas manifestatziones b’at unu “capo corsa” (Componidori in sa Sartiglia, Caixer Senyor in sa Ensortilla) chi tenet su podere de seberare sos cadderis pro sa carrelada.
Su Caixer Senyor est unu de sos nòbiles de sa tzitade (unu tempus finas in sa Sartìglia fiat gasi) e ispendet bona chedda de dinari pro sa manifestatzione e pro su bestire, chi si podet impreare non prus de duas bortas a fila a pare.
Su Componedor in sa Ensortilla no est su “capo corsa” ma su giùighe de sa gara, s’àrbitru.
E si in Sardigna s’òbligu de abarrare a caddu dae s’incomintzu a sa fine de sa gara lu tenet ebbia su Componidori, in Minorca lu tenent totu sos 120 cadderis chi non podent calare dae caddu finas chi sa manifestatzione no est finida (a sas 4 de mangianu, dae sas 2 de sero chi nch’aiant sètzidu!)
In sa festa de Minorca est presente finas un’àtera figura de importu, chi est s’Homo des Be (‘uomo dell’agnello’). Est unu massaju bestidu cun una mastruca de pedde e portat a coddu pro sa die intrea unu mascru de berbeghe, pro promissa a Santu Giuanne patronu de sa festa (àteru assimìgiu cun sa Sartìglia, ca su patronu de su Grèmiu de sos Massajos est Santu Giuanne).
(GF.P.)
