(testu in italianu liaiu dae su giassu Acadèmia de su Sardu)
Antonio Garau est stètiu unu cummediògrafu in lìngua sarda de importu mannu de su 1900. Cumentzat is istùdius in Santu Lussurzu in su collègiu de is Salesianus;istùdius chi depit interrumpi a s’edadi de 14 annus po agiudai su babbu in butega. Sighit peroa a studiai a solu, acoste.ndi.sì a su teatru. Tenit su disìgiu de andai a studiai a s’Acadèmia de is Artis bellas a Roma, ma depit sighiri a traballai in butega.
Antonio est unu piciocu brullanu, geniosu, abbistu e scit fai arriri sa genti. Sighit a trastigiai me in is teatrus aristanesus cumintzendi a fai s’atori in is cummèdias de Vincenzo Melis (Ziu Paddori, Su bandidori, L’onorevole a Campodaliga).
Seus in su tempus de su Fascismu, e est insaras chi, in su 1934, Antonio Garau scriit sa primu òpera: “Is campanas de Santu Sadurru”. In is annus chi sighint at a scriri in totu 12 cummèdias.
Sa segundu gherra mundiali peroa firmat sa vida culturali e sotziali de sa Sardigna. Is bombas ndi sciusciant teatrus medas e is chi abarrant in peis ddus serrant.
Ma Garau sighit a scriri: Peppantiogu s’arricu in su 1936, Pibiri sardu in su 1943, Sonnu trumbullau in su 1945.
In su 1950 scriit Basciura, sa cummèdia chi dd’at giau prus nomena bella.
Garau cun is cummèdias cosa suas, at bintu prèmius meda.
Su prèmiu “Grazia Deledda” in su 1950 cun Basciura; su prèmiu Ozieri cun Giuseppi e Maria in su 1972, in su 1975 cun Sa corona de zia Belledda e in su 1979 cun Su Mundu de Ziu Bachis.
Candu scriiat una cummèdia, Garau fadiat stùdius meda chi pertocànt su logu sceberau po dda ambientai. Circàt is traditzionis de cussu logu, ascurtaiat sa genti fueddai e annotàt is fueddus antigus, is dicius, chi apustis portàt aintru a is cummèdias cosa suas.
Antonio Garau at fatu unu traballu mannu chi at agiudau sa lìngua sarda a non si sperdi, in unu tempus difìtzili po sa lìngua nosta, chi insaras fiat perdendi s’importàntzia chi iat tentu in sa vida de ònnia dii e in sa cultura.
Su teatru de Aristanis est intregau a custa figura manna de sa cultura sarda e in su 1998 su comunu dd’at intregau fintzas sa bia ancà Antonio Garau est nàsciu e crèsciu.
