Sa tamàtiga de apasibis est unu Produtu Agroalimentari Traditzionali de Sardigna fait parti de sa categoria de Produtus vegetalis a su stadu naturali o trasformau.
Mancai nci siat in totu Sardigna, est unu produtu acapiau meda a sa traditzioni de is biddas de Marmidda Arta.
Ònnia famìllia de messajus, candu fiat de fai s’ortu, allogàt in antis su sèmini de sa tamàtiga de s’annu prima.
Po custa arraxoni sa tamàtiga allogat is caraterìsticas suas de su logu.
Est un’arratza forti chi crescit beni sena de dd’acuai e non ddi atacant maladias. Abarrat pitia o mesana, a forma tunda o unu pagu allonghiada, a troni, a colori arrùbiu forti e aguantat a is aprapuddus, po custa arraxoni s’imprestat a essi tragada e de s’allogai beni finas a s’ierru.
S’arregorta si fait a manu, prus o mancu a s’acabbu de su mesi de austu.
Si papat frisca o po cundiri o po fai cunserva.
Est traditzioni nosta allogai custa tamàtiga in apadibi o apiconi, est a nai a dd’apicai in unu filu annuitau a is cabudus, a forma de cannaca, prus o mancu de 40 cm in logu sbentiau beni.
