Domìnigu 28 de abrili s’afestat sa Dii de sa Sardigna.
Medas sunt is avenimentus in programma in Sardigna e finas foras de Sardigna, po arregordai cussus acuntèssius.
In Tàtari unu programma arricu de atòbius a movi de su 24 de abrili cun “Sa sarda rivolutzioni contada a is piciocheddus”; unu mangianu intregau a is iscolas, cun fueddus, mùsica e contus a pitzus de sa Dii. S’at a sighiri su 27 de abrili de is ses de merici cun unu spetùculu de teatru mòbli cun artistas meda. Su 28 de abrili s’at a inaugurai su primu monumentu a is rivolutzionàrius sardus, in su largu de Don leonardo Carboni.
Ma àterus avenimentus nci ant a èssiri in Sardigna e ndi eus a fueddai. E àterus atòbius sunt prevididus finas in su continenti.
Arregordaus cussu in Bologna, cuncordau dae su Tzìrculu Sardegna Bologna APS; sàbudu 27 de abrili, in sa Domu de Quartiere Saffi in Bia de Lodovico Berti 2/10, una dii intregada a sa sarda rivolutzioni fueddendi finas de atualidadi e paesàgiu.
Àteru atòbiu de non perdi po is sardus continentalis e finas po is chi non sunt sardus ma ndi bolint sciri de prus de sa cultura nostra, est cussu de La Canigiana in sa bia Treggiaia 146, in La Romola (tzitadi metropolitana de Firenze), cuncordau dae s’assòtziu Culturali Sardus a manu de pari cun s'azienda de massaria La Canigiana. S’at a cumentzai cun una cunferèntzia a suba de sa Dii de sa Sardigna e s’t a sighiri cun unu murzu cun produtus sardus. A pustis pràndiu at a èssiri Andrea Cubeddu nàsciu in Orani, a stentai is òspitis cun sa mùsica cosa sua.
