Su 10 de su mesi de ladàmini arruit sa Giorronada mundiali de sa Saludi mentali, chi dda favoressit cun campànnias e incentivus s’Organizatzioni mundiali de sa sanidadi.
Nàscia in su 1992 po abrìtiu de su visu-segretàriu generali de sa Federatzioni mundiali po sa saludi mentali, de su 1994 mudat ònnia annu su tema de arriferimentu.
In ònnia modu sa giorronada, arreconnota a livellu internatzionali, tenit sa bidea de sensibilizai sa genti in contu de saludi mentali.
Po s’ocasioni sa ASL n.5 de Aristanis e su Tzentru de Saludi Mentali de Aristanis, cun s’agiudu de su Tzentru Servìtzius Culturalis UNLA de Aristanis e su patrocìniu de su Comunu de Aristanis, ndi ant pesau unu programma aposta po cras:
- in sa sala de sa bia de Carpaccio, in su Tzentru UNLA cun s’agiudu insoru, a mangianu, de is 10 a is mesudii, sceti po is impitadoris de is duus tzentrus pagora arremonaus, s’at a ammostai materiali audiuvisivu asuba de sa sensibilizatzioni de sa saludi mentali. De mesudii, e sa mesora apustis, nci at a ai una arraxonada asuba de sa saludi mentali in connessioni cun àteras tzitadis de Itàlia;
- in pratza de Eleonora, cun su patrocìniu de su Comunu de Aristanis, a is 5 e mesu de merii s’ant a intreverai mùsica e ligidura de unu branu chi pertocat sa saludi mentali, mentras a is 6 nci at a essi s’atòbiu “Agorà. Spazi per generare Salute Mentale”. A chini bolit pigai parti depit teni a menti ca tocat a chistionai fadendi-sì allistai in antis e sena de sartai 4 minutus, tocat a arrispetai su chi chistionat, sena de nci chistionai suba, non si depit donai giudìtziu asuba de su chi pensant is àterus e tocat a si portai beni.
