In su 1945, a pustis de sa distrutzione, su degollu de sa Segunda Gherra Mundiale, est nàschida s’organizatzione de sas Natziones Unidas cun sa punna printzipale de evitare chi in su mundu bi esserent àteras gherras. Su 25 de abrile de cussu annu, in sa tzitade americana de San Francisco, 50 guvernos riunidos impare ant incomintzadu a iscrìere s’Istatutu de s’Organizatzione. S’Istatutu est istadu adotadu su 25 de làmpadas de su 1945 e ratificadu su 24 de santugaine de su matessi annu. In s’Istatutu est crara sa punna de sas Natziones Unidas: s’amparu de sos diritos umanos, sa tutela de sa paghe e seguresa, agiudare sos pòpulos e paisos in dificultade e promòvere s’isvilupu giustu e sustenìbile de totus. Dae su 1971 s’ONU racumandat a totus sos paisos chi nde faghent parte de ammentare sa data de su 24 de santugaine cun una festa pùblica.
Imparare dae su tempus passadu pro mudare in mègius su tempus benidore, sentza si nde ismentigare de nessunu.
Gherrare in nùmene de sa paghe e giustìtzia sotziale in su mundu, totu paris pro agiudare sos prus pòberos, sos prus in dificultade.
(MM)