Ocannu at a èssere su Comune de Aristanis chi at a ospitare sas commemoratziones traditzionales de sa Die de s’Unidade Natzionale e de sa Die de sas Fortzas Armadas.
In pratza Marianu IV a sas 10 e mesa s’at a fàghere sa tzerimònia militare, chi at a comintzare cun sa parada de rapresentàntzias de sa Fortzas Armadas, de sa Politzia de Istadu, de sa Guàrdia de Finàntzia, de sa Politzia Penitentziària, de su Corpus Forestale de sa Regione, de sa Capitaneria de Portu, de sos Vìgiles de su Fogu e de sa Croce Rossa.
Su prefetu Fabrizio Stelo, acumpangiadu dae su sìndigu de Aristanis Massimiliano Sanna e dae su Cummissàriu istraordinàriu de sa Provìntzia Massimo Torrente, at a depònnere sa corona in onore de sos Mortos in Gherra. Sa tzelebratzione at a finire cun sa letura de sos messàgios de su Capu de s’Istadu e de su Ministru de sa Difesa. At a presentziare finas una rapresentàntzia de sos Assòtzios de Cumbatentes e de Arma, ognunu cun su gonfalone sou.
Sa tzerimònia at a sighire a su sero, a sas 7 mancu cuartu (h 18,45) in su Teatru Garau.
A pustis de un’interventu de saludu de su prefetu, Giuseppina Pintus e Francesco Gallittu (duos giòvanos laureados dae pagu in Sièntzias Chìmicas e Geològicas de s’Universidade de Casteddu) ant a espònnere sos resurtados de sos ùrtimos istùdios fatos in contu de su fogu chi in su 2021 at caladu a chisinu su Montiferru.
Sa serada, acumpangiada dae su coro polifònicu “Pierluigi da Palestrina” de Crabas, at a sighire cun sa cunsigna de sos reconnoschimentos de s’Òrdine “Al Merito della Repubblica italiana”.
(GF.P.)
