Sa Fundatzione Mont’e Prama est nàschida pro valorizare e fàghere a connòschere su patrimòniu de su Parcu archeològicu naturale de Crabas e de su Sinis.
Pro su primu Festival internatzionale de s’archeologia chi s’at a fàghere intre su 28 de làmpadas e su 3 de trìulas at istituidu su prèmiu ispetziale “L’Isola dei Giganti” chi s’at a destinare onni annu a una persone chi s’est distinta in su mundu de sa comunicatzione; unu segundu prèmiu, intituladu “Mont’e Prama” est destinadu a gente chi s’est fata a connòschere in su mundu de sa chirca iscientìfica.
Pro custa prima editzione su prèmiu “L’Isola dei Giganti” benit assignadu a Piero Angela, chi dae annos meda est in prima lìnia in s’atividade de isparghimentu de connoschèntzia in matèria de sièntzia, istòria e cultura.
(GF.P.)
