Sa Pro Loco de Arborea est cuncordendi una rassinna de teatru ètnicu.
Podint pigai parti a sa rassinna is scolas segundàrias de II gradu pùblicas o privadas, scolas de teatru cun piciocheddus de 15 a 19 annus de edadi, grupus teatralis chi non siant professionistas de ònnia edadi bastit chi sigant su tema de sa rassinna.
Sa rassinna s’at a fai in su Teatru salesianu de Arborea movendi de s’11 e finas a su 16 de su mesi de onniasantu de ocannu, is grupus s’ant a acolli movendi de su 10.
Sa rassinna punnat a favoressi su teatru comenti a veìculu po amparai is lìnguas localis e po su recùberu de sa cultura identitària, pesendi-ndi unu logu de cunfrontu, crescida circhendi de ndi scoberri s’arrexina comuna.
Is òperas si podint intregai in lìngua italiana, lìngua sarda, dialetu locali o regionali o in lìngua stràngia e depint portai a tema sa cultura identitària o aspetus sotzialis acapiaus a su territòriu e a is traditzionis localis. Depint durai non prus pagu de 40 minutus e non prus de 60 contendi-ndi finas su pausu de mesu. Is rapresentatzionis podint essi pigadas de òperas literàrias o pesadas a nou ma in ònnia modu depint valorizai sa cultura locali.
Is iscritzionis si depint fai aintru de su 30 de cabudanni e non si pagat nudda.
Ònnia grupu podit pigai parti cun una o prus òperas e s’amitint puru cussas giai fatas a connosci in àteras rassinnas.
Is spesas de biaxi, po papai e corcai funt a càrrigu de is scolas o grupus, acontessendi de oteni, sa Pro Loco de Arborea, contributus s’at a podi assinnai unu importu po agiudai is spesas cunforma a su logu de anca s’arribat.
Po ndi sciri de prus: presidente@prolocoarborea.it
