A intru de su Parcu Naturali de Monti Arci, agataus in su sartu de Biddobrana sa Mitza de su Crucui, anca calat àcua bella a bufai.
Custa àrea naturalìstica s’agatat a 300 metrus de artesa, in mesu a s’arroca vulcànica e a unu padenti de matas de ìlixi, arrideli, murta, modditzi e olioni. Ddui passat s’arriu “Sa roia de su crucui” chi a logus fait a spenduledda e a logus a piscina, non ddui ammancant pontixeddus de pedra po ddu atraessai.
Sa fàuna est cussa chi s’agatat in totu Monti Arci, tìpica de Sardigna, comenti a su gatu aresti, su buchimeli, su schirru, su sirboni, su stori, sa tzuaddina, su tzerpedderi, sa mariapiga, su spreberi.
Su logu est fruniu de mesa po papai, su mori po ddui arribai est sinnalau.
A pagu tretu si biit su nuraxi Turriu e s’agatat sa gruta “Su secretu de sa Conca ‘e s’òmini”, anca, si contat, in tempus antigu acorrànt is fèminas non cojadas chi iant tentu fillu.
