Domigu 22 de cabudanni s’at a fai sa tzerimònia ufitziali chi at a biri su Muristeni de Santa Crara de Aristanis Logu de su Coru de su FAI (Fundu po s’Ambienti Italianu), a cumpimentu de sa carrela longa initziada in su 2022.
Cun unu contributu de “Intesa Sanpaolo”, de 14 milla èurus, chi at pediu su Muristeni de Santa Crara, in virtudi de unu acòrdiu fatu cun sa Prefetura de Aristanis meri de su beni, s’at a permiti de valorizai su Muristeni cun unu progetu de circa, coordinau de professori Andrea Pala cun s’agiudu de unu comitau scientìficu, po ndi pesai unu “totem” digitali interativu chi serbit a faiconnosci is vicendas stòricas e artìsticas de su fràigu e de su muristeni in is sèculus.
Su stauli de domus de Santa Crara ddu iant pesau in formas gòticas faci a su 1343, anca giai ddui fiat sa crèsia de Santu Bissenti. Ddu iat bòfiu abiatzai Pedru III de Bas Serra, rei de su Giudicau de Arbarei, devotu a Santa Crara. Ddu biviat a ùrtimu pobidda sua e innia dda iant interrada.
Su giuxi Marianu IV, mortu su fradi Pedru, iat acabbau su fràigu fadendi una lassa a s’annu a is tredixi mòngias chi ddui fiant.
In sa crèsia, una pintura parrit afigurai Marianu IV chi intregat a Santa Crara su fillu Ugoni e una scrita asuba de una tella de pedra documentat sa tumba de Costanza, fiuda de Pedru III.
Su stili de su fràigu ecresiàsticu sighit is schemas goticus frantzesus chi impreànt is maistus in Aristanis sighendi sa moda toscana.
S’afaciada de sa crèsia est a pedra arenàrgia, a duas monòforas farsas a perparti de unu rosoni postu in mesu, asuta de su campanileddu.
A intru, sa bòvida est a cruxera, ddui at un’àbsidi cuadrada cun arcu a punta de mitra chi incornissat una bìfora. In s’arcu de s’àbsidi ddui funt is stemmas de sa famìllia de is reis (sa mata israxinada) e de su stadu (is palus de Aragona).
Su muristeni est totu a ingìriu de una pratza cun putzu in mesu, ddui bivint, oi puru, is mòngias de craurusa.
