Sa Scola Cìvica de Mùsica de Aristanis aberrit sa genna a is chi bolint pigai parti a is letzionis individualis e colletivas chi pertocant is cursus in previsioni de is iscritzionis po ocannu chi benit. Is maistus ant a essi prexaus de fai acatu bellu a pipius, piciocheddus e a genti manna in sa sea de sa bia de Costa, n.10 in Aristanis, in sa cida chi movit de lunis 8 a su sàbudu 13 de abrili.
Sa genti stràngia nci at a podi essi candu funt fadendi is letzionis de cantu lìricu, cantu modernu, cantu de corus, pianoforti, violinu, ghitarra clàssica e elètrica, organetu, propedèutica musicali, teoria e solfègiu.
In prus at a podi castiai sa letzioni chi ammostat comenti at a essi su cursu chi s'at a fai de òrganus a canna in sa Catedrali de Aristanis.
In s'annu scolàsticu 2024-2025 s'ant a aberri cursus de pianoforti modernu e jazz, flàutu traversu, clarinetu, sassòfonu, trumba, violoncellu, òrganu a canna, bassu elètricu, launeddas e informàtica musicali.
Po connosci s'oràriu de is letzionis e po si prenotai tocat a cuntatai a sa segreteria de sa Scola Cìvica de Mùsica de Aristanis, me in is diis lunis, mèrcuris e cenàbura de is 3 a is 7 de merii, a su nùmeru de telèfonu 3896189463.
