Su Tzentru trasfusionali de su spidali de “San Martino” de Aristanis torrat a fai apellu, a is chi ddu podint fai, po donai su sànguni chi abisòngiat a sarvai sa vida de genti meda.
Po tanti fait a sciri ca in su Tzentru trasfusionali de su spidali s’arriciint is donadoris ònnia dii, fora de su domigu, de is 8 de mangianu a is mesudii e no abisòngiat a s’allistai in antis ma fait a ddui andai inderetura.
In prus is voluntàrius de is setzionis localis de s’AVIS de totu sa provìntzia de Aristanis funt a disponimentu de is donadoris in custas biddas in custu mesi: mèrcuris 6 in Bosa, sàbudu 9 in Suni, domigu 10 in Baressa e Marrùbiu, sàbudu 16 in Paulle, domigu 17 in Bilàrtzi e Arborea, cenàbura 22 in Busache, sàbudu 23 in Sabarussa, domigu 24 in Abas e Arcidanu, mèrcuris 27 in Bosa e sàbudu 30 in Santa Justa.
