Sa ASL N.5 de Aristanis at incarrelau sa campànnia de preventzioni e informatzioni po non si ndi buscai is virus de sa Calentura de su Nilu e de su Usutu Virus.
Po custa arraxoni su Dipartimentu de Igieni e Preventzioni Sanitària e su Servìtziu de Sanidadi Animali nci ant mandau a is 88 amministratzionis comunalis de sa Provìntzia de Aristanis un'annota po fai connosci is virus e is fainas de ponni in campu po circai de non fai impestai su logu de sìnsala me in is territòrius de cumpetèntzia.
Pigant parti a custa faina finas is mèigus de famìllia, is pediàtras acapiaus a sa ASL e is struturas sòtziu-sanitàrias.
Su virus de sa Callentura de su Nilu dd'atacat sa sìnsala spitzulendi su pilloni fertu e acoa a s'òmini o a àterus animalis. In 80% de is bortas si svilupat sena de arraghèscias, in giai su 20% ocasionat arraghèscias sìmbilis a s'infruèntzia (callentura, dolori de conca, gana mala) e in su 1% scarsu ocasionat encefaliti e meningoencefaliti.
S'Usutu virus, prus pagu connotu de s'àteru, podit portai a morti pillonis e portai arreghèscias a s'òmini.
Duncas est de importu mannu chi is tzitadinus sigant arrègulas de fundamentu po protegi insoru e sa genti prus dèbili.
Prima de totu tocat a circai de non lassai àcua stangiada a longu innui sa sìnsala fait is ous, ma finas de ammantai comenti si depit gisterras o stèrgius chi arragollint àcua. In prus tocat a si defensai cun fragus chi stratallant sa sìnsala, oprighendi is ventanas cun arretza a tramma fini, e abarrai atesu de parcus e giardinus cun àcua, a su merii, candu sa sìnsala est prus scida.
Po ndi sciri de prus bai in su giassu de sa ASL N.5 de Aristanis e scàrriga su libureddu informadori.
