Sa ASL n.5 de Aristanis fait a sciri ca est in funtzioni s’Ispetorau micològicu in sa sea de sa bia de Carducci 35, su de 5 pianus, in Aristanis.
Ndi fait parti personali calificau e abilitau chi fait faina de preventzioni e càstiat, a indonu, sa calidadi de su cordolinu assoddiu po ddu papai.
In prus s’Ispetorau favoressit cursus de formatzioni e de educatzioni sanitària e frunit sa certificatzioni, ca est bellu a papai, chi serbit candu si depit bendi su cordolinu o si depit donai a papai in logu de ristoranti.
S’Ispetorau contzillat:
- de non papai mai cordolinu, cotu o cruu, candu non si connoscit beni e non si sciit chi est tòssigu o ferenosu.
- de non ndi papai meda e de no arregolli a cofas cordolinu siat giòvanu che bèciu, annarbau o de logu acanta de muntonàrgius, de bias traficadas meda e de logus anca si spaniat meixina;
- po arrispetai s’ambient, de ndi tirai a pagu su cordolinu de terra e a ddu poni in canisteddus stampaus po ndi fai arrui a terra su sèmini suu;
- de ddu papai cotu beni e de non ddu donai a pipius o a fèminas chi abetant fillu;
- de curri a s’ispidali acontessendi de non s’intendi beni apustis de ai papau cordolinu, ingollendi avatu s’avantzu de sa cosa de papai, po agiudai a ddu arreconnosci mellus.
S’Ispetorau micològicu est abertu su lunis, mèrcuris e cenàbura de is mesudii a sa una, telefonendi in antis a su nùmeru 07833177-21 (o-87 o -29 a s’acabbu).
Su cordolinu non bolit portau a sachita de plàstica ma a canisteddu cìrdiu e stampau, su cordolinu depit essi partziu po arratza, friscu, lìmpiu e intreu, totus e non unus cantu.
