Su Dipartimentu de Igieni e preventzioni sanitària de sa ASL n.5 de Aristanis fait a sciri ca de su 6 de maju movit sa vacinatzioni contras a s'HPV, punnada a preveniri sa bessida de tumoris po nexi de su Papilloma virus, responsàbili, prus o mancu de 6500 casus de cancru ònnia annu in Itàlia.
Po tanti is piciocheddas de 11 annus finas a is 25 e is piciocheddus de 11 annus finas a is 18 de sa Provìntzia de Aristanis ant a arriciri a domu s'invitu a telèfonu o a lìtera po andai a is ambulatòrius de Igieni pùblica po si fai vacinai a indonu.
S'ant a podi vacinai, sena de pagai, finas totu is fèminas, chi ant sartau is 25 annus de edadi, giai curadas po essi fertas de HPV, totu is sugetus cun infetzioni de HIV e totu cussus chi tenint raportus sessualis cun genti meda.
Su vacinu s'at a fai in duas bortas po is chi tenint finas a 14 annus e in tres bortas de 15 annus a sighiri.
S'at a movi tzerriendi in antis is piciocheddas e picicocheddus prus pitius finas a lompi a cussas de 26 annus.
