Gràtzias a sas assuntziones noas, sa ASL de Aristanis at a pòdere afortiare repartos e servìtzios in dificultade fintzas ca sunt andados in pensione unos cantos dotores.
De sos dotores assuntos, deghe a traballare in su Dipartimentu de Preventzione impignadu pro s’emergèntzia Covid-19, ma fintzas pro totu sas atividades de tutela de sa salude de totus, comente sas vatzinatziones, sos controllos oncològicos, sas tzertificatziones mèdicu-legales, su controllu de sa seguresa de sos alimentos e de s’abba potàbile, su controllu de sa seguresa in su traballu, sas atividades de sa sanidade veterinària, sa meighina de s’isport.
Tres dotore ant a èssere impignados in su Laboratòriu Anàlisi e duos in su Servìtziu de Neuropsichiatria infantile; un’àteru at a traballare pro s’Anatomia Patològica. Ant a èssere leados fintzas unu ginecòlogo, un’uròlogo e unos cantos nefròlogos. Est giai operativu unu radiòlogo cun cuntratu lìberu professionale.
Gràtzias a una cunventzione cun sa Asl de Tatari at a èssere a disponimentu unu pneumòlogo pro sas broncoscopias.
In prus de sos dotores, sunt istados assuntos sete infermieris, bator tècnicos de sa riabilitatzione psichiàtrica, duas maistras de partu e unu fisioterapista.
(MM)
