Su sartu de Asuni arregallat in unus cantu de logus arrastus de sa preistòria sarda.
Fadendi sa bia chi de Asuni nci portat a Nureci, in localidadi Perdixi, si podint biri tres perdas fitas in trachiti murena a tipu protoantropomorfu, chi iant aciapau stèrrias in terra e acoa torradas a strantargiai.
Una est arta 215 cm, lada 75 cm e grussa 50 cm, est a faci prana trabballada a martededdu, is ladus stringint a pitzu fadendi unu tundu allonghiau in conca. Su màrgini a manu manca est spitzau e sa fiancada de palas est arruinada meda siat in artu siat a bàsciu.
Un’àtera est arta sèmpiri 215 cm, ma est lada 70 cm e grussa 70. Est custa puru a faci prana, totu traballada, ma ddui at filiduras chi mudant su màrgini a perparti de sa figura. Is ladus si stringint in pitzus fadendi unu tundu in conca.
S’àtera abarrat unu pagu prus bàscia, est arta 200 cm, lada 65 cm e grussa 50.
Sa paci est prana, is màrginis tirant a si stringi in pitzus ma ddi amancat sa parti de asuba.
