S'Ufìtziu linguìsticu “Marmidda in lìngua sarda”, chi interessat is comunus de Abas, Aressa, Arruinas, Bàini, Bobadri, Gonnacodina, Gonnonò, Mogoredda, Mragaxori, Pau, Senis e Useddus, at apariciau sa faina “Aberi su calàsciu”.
S’idea est cussa de ndi bogai de is calàscius scritus, poesias, contus, romanzus, cummèdias, arretzetas, circas, totus scritus in lìngua sarda, chi pertocant s’ambienti, sa stòria, is traditzionis cosa nostas; cun sa punna de ddus publicai, e ddus fai connòsciri.
Is traballus depint èssiri scritus a computer in formau DOC o DOCX e tocat a nci ddus mandai a s’indiritzu cultura@comune.ales.or.it intru de su lunis su 7 de su mesi de ladàmini de su 2024 , scriendi in s’e-mail “Aberi su calàsciu – Avisu Tu.li.S. RAS 2023” e inditendi nòmini, sangunau e nùmeru de telèfunu de chini ddas mandat e is datus de s’autori (si no est sa pròpia personi chi ddas mandat).
Si arribant scritus meda, e su dinai finatziau de sa regioni non ddu fait po publicai totus is òperas, at a èssiri una giuria de spertus chi at a decidi cali ant a èssiri is traballus chi s'ant a publicai.
Po àterus informus e acraramentus fait a telefonai a su Sportellu linguìsticu de is Comunus de Marmidda Arta a su nùmeru 0783/911350 (su mèrcuris e sa cenàbura a mangianu) o a su nùmeru 349/6026986.
