Aberit s’Isportellu Energia, nàschidu aposta pro dare assistèntzia e agiudu a sas impresas chi cherent pedire sos crèditos de imposta energèticos e otènnere esòneros fiscales pro parare fronte a sas bulletas incaridas.
In mesu de tantos progetos postos in campu dae su Guvernu pro parare fronte a s’incarimentu de sas bulletas bi sunt finas sos “crèditos de imposta energèticos”, una forma de agiudu a sas impresas (sas chi tenent potèntzia prus arta de sos 4,5 kw) pro sas ispesas chi ant tentu in custos meses comporende energia elètrica o gas naturale.
Sa norma previdet chi sas impresas potzant pedire a su fornidore issoro de energia de fàghere issu matessi su càrculu de sos crèditos chi l’ispetant, però s’impresa chi retzit si devet fornire dae su matessi bendidore chi teniat in su 2019. Sa continuidade in su rifornimentu de energia, duncas, est tìtulu vinculante pro pòdere delegare a su bendidore su càrculu de su crèditu de imposta. Imbetzes sas impresas chi ant cambiadu su gestore dae su 2019 a su 2022 o chi ant abertu s’atividade a pustis de su 2019 devent fàghere su càrculu de su crèditu a tenore de sas bulletas chi ant retzidu.
“Pro dare assistèntzia cun unu servìtziu dedicadu a su càrculu de sos crèditos de imposta energèticos amus abertu, pro mesu de sa sotziedade de servìtzios Ascom Servizi SRL, s’Isportellu Energia - narat su presidente Nando Faedda -. Su servìtziu at a permìtere a sas impresas de agatare su crèditu de imposta chi lis ispetat finas si in custos ùrtimos annos ant cambiadu gestore. Est dovere nostru de fàghere cantu podimus pro agiuare sas impresas chi sunt parende fronte a unu tempus longu de dificultade manna, e non faghet a las lassare solas”.
Chie est interessadu devet presentare totu sas bulletas in detàlliu de s’annu 2019 e totu sas bulletas in detàlliu de s’annu 2022, non sas de su 2020 e 2021 e non sas faturas eletrònicas. Sos ufìtzios sunt a disponimentu pro dare informatziones.
(GF.P.)
