Torrare a abèrrere s’aeroportu de Fenosu pro nde fàghere unu puntu de riferimentu pro canadair e tràficu de produtos. Est su chi est provende a fàghere su prefetu Fabrizio Stelo dae cando est imbàtidu a Aristanis, ma finas a como est totu blocadu ca mancat su dinari.
Sa prima die de freàrgiu su prefetu at riunidu in Prefetura sos dirigentes natzionales e regionales de s’Ente Natzionale pro s’Aviatzione Tzivile (Enac), cun sa diretzione Aeroportuale de Sardigna, su responsàbile de Aeronike S.p.A. pro sa Sogeaor (sotziedade chi amministrat s’aeroportu de Fenosu), sos cumandantes de sos Vìgiles de su Fogu e su 7° Repartu Bolu pro agatare una solutzione a sas dificultades.
“Sa positzione de Fenosu est tzentrale meda, contra a sos àteros iscalos operativos de Sardigna – ponet in evidèntzia su prefetu – e permitit de risparmiare tempus in s’ativatzione e in s’interventu de sos mezos de agiudu aèreu. In prus, est una possibilidade importante pro sas impresas locales e continentales interessadas a fàghere crèschere sos afàrios in su territòriu, cun possibilidades mannas in contu de isvilupu, de atividades produtivas cullegadas e de ocupatzione”.
“Pagas verìficas ancora, carchi cositedda de megiorare e forsis intro de s’istiu s’aeroportu at a torrare a abèrrere” narant Enac e Sogeaor, finas ca sa Protetzione Tzivile, sos canadair e sos mezos de sucursu 118 nde tenent bisòngiu.
Su prefetu est cuntentu meda, ca su primu passu est fatu. “Como tocat a fàghere acordos fortes intre totu sos chi devent guvernare su territòriu – ispiegat - pro pònnere paris sos obietivos comunes e pro sestare comente fàghere, si cherimus chi sa provìntzia nostra unu cras tèngiat un’isvilupu beru. Invito a totus a retzire sa proposta e a proare a agatare solutziones pro sos problemas atuales, lassende a un’ala sas partzialidades pro parare fronte a itineràrios chi durant in su tempus e sunt traballosos e articulados ma chi podent cambiare s’economia e su turismu de custa bella comunidade”.
(GF.P.)
