“Dae su 27 de cabudanni s’at a pòdere presentare domanda pro su Bandu Agrisolare chi ponet a disponimentu sos agiudos econòmicos prevìdidos dae su Pranu Natzionale de Ripresa e Resilienza. A disponimentu, cun un’iter “a isportellu” e finas a finire su dinari, b’at 1,5 milliardos de èuros destinados a imprendidores agrìculos, a sa sola a assotziados, a cooperativas e a impresas agroindustriales chi pòngiant in sas coberturas de sos capannones impiantos fotovoltàicos”. Lu narat su deputadu Luciano Cadeddu, esponente de ‘Impegno Civico con Luigi Di Maio’ e parte de sa cummissione Agricultura. “Custu at a permìtere de abbacare sas ispesas pro s’energia a sas impresas, e finas de megiorare sas istruturas boghende.nche s’amiantu, isulende termicamente sas coberturas e realizende sistemas de aeratzione chi agiudant su benèssere de sos animales. Su provedimentu rispondet a sas esigèntzias de sas impresas e preservat su terrinu chi in antis de totu cheret destinadu a sa produtzione agrìcula. Est importante in custu momentu chi sas bulletas sunt incaridas meda e ponent in dificultade sas impresas agroalimentares nostras”.
“S’agiudu prus mannu at a èssere pro sa Campània, Molise, Pùllia, Basilicada, Calàbria, Sitzìlia e Sardigna cun su 50 pro chentu. Su restu de Itàlia at a tènnere su 40 pro chentu – ispiegat Cadeddu -. Ant a tènnere maggioratzione de 20 puntos pertzentuales sos agricultores giòvanos o insediados in sos 5 annos in antis, sos investimentos colletivos comente impiantos de magasinàgiu impreados dae unu grupu de agricultores o impiantos de cunditzionamentu de sos produtos agrìculos pro sa bèndida, sos investimentos in zonas sugetas a vìnculos naturales. Si podet otènnere un’antìtzipu de su 30 pro chentu de sa domanda de contributu”.
“Intro de su 30 de làmpadas de su 2026 cheret garantida sa realizatzione, su collàudu e sa rendicontatzione de custos interventos chi diant cunsentire a s’Itàlia de imbàtere a una potèntzia totale de nessi 375.000 kw – agiunghet -. De sas risursas totales su 40 pro chentu, chi currispondet a 600 milliones de èuros, est riservadu a finantziare progetos de fàghere in sas Abrutzu, Basilicata, Calàbria, Campània, Molise, Pùllia, Sardigna e Sitzìlia comente prevìdidu in su PNRR”.
(GF.P.)
