Pro nche bogare dae s’ispiàgia de Turre Manna sos materiales isbandonados chi diant pòdere cuntènnere amiantu, sos interventos de bonìfica los ant afidados a Ivi Petrolìfera e Ste.Sil.Ambiente, pro una summa totale de 133mìgia èuros Iva inclusa. Sos ufìtzios de su Comune de Aristanis ant acabbadu s’iter de cunferimentu a pustis de gara in SardegnaCat, a in ue b’aiant rispostu oto aziendas.
In su 2014 su Comune aiat retzidu pro sas bonìficas in Turre Manna unu finantziamentu de 300mìgia èuros dae s’Assessoradu regionale de sa Difesa de s’ambiente. Duos annos a pustis, aiant incarrigadu de sos traballos a sa sotziedade Cotema. Sas operatziones pro nche bogare sos refudos perigulosos, però, no las aiant cumpletadas.
Àteros 200mìgia èuros fiant imbàtidos in su 2018, a intro de sa programmatzione de su Patu pro s’isvilupu de sa Regione Sardigna, cun sas intradas Fsc. In su mese de maju 2019 s’amministratzione aiat leadu s’impignu de pònnere in bilàntziu àteros 10mìgia èuros.
(GF.P.)
