Dae pastorigare su bestiàmene a sa notoriedade in sos social network.
Paret su contu de Cenerentola in versione maschile imbetzes est su chi est capitadu a Andrea Rosas, unu pitzocu putumajoresu chi cun su vìdeu "Ànima mia", fatu cun su Tenore de su Remèdiu de Orosei, at tentu prus de 200mìgia visualizatziones.
"Mi nde so ispantadu finas deo" narat su cantante, chi at comintzadu a si fàghere connòschere in su 2017 cun su "Decàlogu de sa tramudada (Decalogo della transumanza)". Sa notoriedade manna, però, l'at tenta cun sa protesta de su late, in su 2019: tando at comintzadu a contare in sos vìdeos suos a cantas dificultades devet parare fronte unu pastore e cantu est dificultosu e bellu "a fàghere unu traballu importante gasi". At finas iscritu a sos polìticos pro pedire atentzione pro sa categoria.
"Ànima mia" est una decraratzione de amore pro sa Sardigna. Dae sos pensamentos de su pastore-cantante, Nicola Cancedda nd'at fatu unu testu e Davide Guiso e Francesca Lai los ant postos in mùsica.
In su discu omònimu, chi essit in custu mese, Andrea Rosas cantat cun Maria Luisa Congiu e cun Gigi Sanna de sos Istentales. B'at finas una cantzone dedicada a s'àrdia de Putumajore, bidda de orìgine de Rosas chi at fatu sa prima presentada in palcu cando teniat 10 annos, in sa festa de santu Cristolu.
Su vìdeu de "Ànima mia" lu podides abbaidare incarchende inoghe.
Chie cheret ascurtare sa cantzone "Cantende che pastore" podet incarcare inoghe.
(GF.P.)
