Sa Giunta Sanna, a pustis de sa proposta de sos assessores a s’Ambiente e a sos Traballos Pùblicos Maria Bonària Zedda e Simone Prevete, at aprovadu su progetu de fatibilidade tècnicu-econòmica pro nde betare a terra e bonificare dae s’amiantu s’iscola segundària de 1° gradu “Grazia Deledda” de carrera Santulussurzu.
Su progetu est finantziadu cun 705mìgia de èuros dae sa Regione a intro de su Pranu operativu pro s’ambiente “Interventos pro s’amparu de su territòriu e de sas abbas”.
“S’iscola l’aiant serrada in su mese de santandria de su 2020 a pustis de sa decraratzione chi naraiat chi cussu edifìtziu non fiat seguru – ammentat su sìndigu Massimiliano Sanna -. Totu in una nos semus agatados a intro de un’emergèntzia bera: tocaiat de garantire chi sas letziones essere sighidu, de agatare un’edifìtziu pro nche collocare s’iscola e, a ùrtimu, de cumprèndere ite nde fàghere de s’iscola serrada. Sas 14 classes de s’istitutu a primu las ant ospitadas àteras iscolas de Aristanis; ocannu passadu ant agatadu una sede definitiva in sos locales de s’Istitutu Frassinetti betzu. In presse, cun dificultade manna, amus agatadu e atretzadu una sede pro permìtere a su bighinadu de Santa Rughe, a sas famìllias chi bi vivent e a sas chi tenent cussa parte de sa tzitade comente riferimentu de mantènnere s’iscola”.
“Dae un’anàlisi atenta amus bidu chi non si podiat fàghere sa bonìfica sena nde bogare sos elementos istruturales chi permitint s’istabilidade de s’edifìtziu, chi diat èssere cumpromìtida si nde bogamus sos pannellos de tzimentu amiantu – agiunghet s’assessora Maria Bonària Zedda. Cun custu progetu, duncas, nde bogamus sos materiales chi cuntenent amiantu, los tratamus, los imballamus e nche los leamus a sa discàrriga. Pro s’interventu totale de betadura a terra e de bonìfica cumpleta (unu millione e 340mìgia èuros) amus pedidu unu finantziamentu integrativu de 634mìgia èuros a sa Regione”.
“Su progetu previdet de demolire sas istruturas, de nde bogare sos aparèchios ìdricos/sanitàrios, s’impiantu elètricu, s’impiantu tèrmicu e sos termosifones – ponet in craru s’assessore a sos Traballos Pùblicos Simone Prevete -. Tocat duncas a nde bogare sas istruturas chi sunt in intro de s’edifìtziu e a bonificare dae s’amiantu e dae sos materiales perigulosos chi bi sunt. A pustis s’ant a fàghere campionamentos e anàlisi de laboratòriu pro cumprèndere bene su tipu de amiantu chi est in s’istrutura, analizende in manera particulare sas bòvedas e sas lastras de tamponamentu e de divisione internas. Non faghet a fàghere sas bonìficas sena nde bogare sos elementos istruturales chi dant istabilidade a s’òpera, ca a nde bogare ebbia sos pannellos de tzimentu amiantu diat fàghere dannu a sa solididade de s’edifìtziu. Est un’interventu importante meda, ca s’iscola est a curtzu a un’àtera iscola, a sa palestra e a su campu de atlètica. Pro custa resone bi cheret un’interventu de betadura a terra e de bonìfica de totu su logu, chi s’at a pòdere fàghere a pustis retzidu su finantziamentu nou de 634mìgia èuros”.
(GF.P.)
