Sa Fundatzione Mont'e Prama paris cun su Dipartimentu de Sièntzias Econòmicas e Aziendales de s'Universidade de Casteddu, cun su Comune de Crabas e cun s'Assòtziu Entes Locales pro s'Ispetàculu e sas Atividades Culturales at a fàghere una "Iscola de istiu in archeologia pro su turismu" chi cheret formare gente chi potzat fàghere promotzione a sos benes archeològicos e culturales in manera dinàmica e moderna.
S'iscola s'at a fàghere in Crabas in su tzentru polivalente dae su 27 de làmpadas a su 3 de trìulas de su 2022 e su programma previdet 6 oras a sa die (h 9,00-14,00 e 15,30-17,30), cun una parte de formatzione teòrica e una de formatzione esperientziale.
Su cursu, destinadu a istudiantes, laureados, giornalistas, divulgadores iscientìficos, ghias turìsticas e archeòlogos, at a tratare argumentos vàrios: dae sa comunicatzione orientada a su mercadu, a s'arte de contare istòrias e de fàghere emotzionare, a sas tècnicas pro faeddare in pùblicu, a comente impreare sos social media pro fàghere promotzione, a comente fàghere vìdeos.
Sa cuota de partetzipatzione est de 500 èuros, chi sunt pro s'iscrìere, pro dormire (in aposentos dòpios) e pro mandigare in istruturas cunventzionadas. Sos postos a disponimentu sunt 20.
Totu sas informatziones las podides agatare in su link https://www.isoladeigiganti.it/wp-content/uploads/2022/06/SUMMER-SCHOOL.pdf, in ue b'est finas su mòdulu de iscritzione chi cheret mandadu intro de su 24/06/2022 a s'indiritzu assoentilocali@pec.it, cun allegada totu sa documentatzione in formadu pdf.
Pro cale si siat crarimentu si podet iscrìere a s'indiritzu summer.school@isoladeigiganti.it o telefonare a sos nùmeros 070-491272 / 348-7243378.
Su situ de riferimentu est www.isoladeigiganti.it.
(GF.P.)
