Finas su Comune de Aristanis at aderidu a sa campagna pro sensibilizare contra de su tràficu de èsseres umanos ponende unu cartellone in Pratza de Citadi (‘piazza Eleonora’).
Custa campagna, chi tenet s’islogan “Sa tziviltade no amitit cadenas”, intrat in sa de XVI Dies Europeas contra de custa barbàrie e at bidu sa Regione Sardigna impignada in prima persone a informare e sensibilizare pro cuntrastare pregiudìtzios, òdiu e farsidades contra de sos migrantes.
“Su tràficu de persones est una forma de iscraitùdine e de umiliatzione de sa dignidade umana – at naradu su presidente de sa Regione Christian Solinas -. Custa die dat sa possibilidade de denuntziare chi, in totu su mundu, b’at mìgias de persones, òmines, fèminas e pitzinnos, obligadas cun trampas e ingannos a si nch’andare dae logos issoro, isfrutados in giros de prostitutzione, tràficu de òrganos, pedidura, cojos fatos a fortza, adotziones illegales. Est unu crìmine contra de s’umanidade, chi totus depent ischire. Sa gente cheret sensibilizada, màssimu sos giòvanos, e sas istitutziones chi gherrant contra de custa cosa cherent agiuadas”.
S’amministratzione regionale dae tempus meda est impignada in polìticas contra de su tràficu umanu, coordinende sas atziones de sas istitutziones pùblicas e de sas organizatziones chi traballant a livellu regionale contra de custu tràficu. In s’ùrtimu annu, gràtzias a su Progetu Elen Joy chi est finidu in su mese de cabudanni, ant agiuadu 42 persones, 23 fèminas e 19 òmines, chi fiant in àmbitos diversos de isfrutamentu, sessuale o de traballu.
Su traballu de sas unidades de istrada, chi òperant a de die e a de note in sos logos de s’isfrutamentu, at bogadu a campu chi su nùmeru de sos òmines isfrutados in su traballu est crèschidu, e custu mustrat chi bi cheret un’interventu importante finas in custu setore.
Sa Regione at rinnovadu s’impignu suo finas cun una campagna de comunicatzione istitutzionale, prevìdida dae su Pranu Regionale Immigratzione 2022 chi est comintzada s’8 de martzu e est articulada in dies a tema, illustradas dae sas tauleddas de su fumetista Bepi Vigna.
Sunt prevìdidas una sèrie de atividades de sensibilizatzione e su palatzu de s’Assessoradu de su Traballu at a espònnere su cartellone “La Regione NON TRATTA”.
A custa initziativa b’ant aderidu finas sas amministratziones comunales, chi ant a espònnere cartellones in sos monumentos tzitadinos printzipales: Casteddu in su Bastione, Tàtari in su Palatzu de Tzitade, Aristanis in Pratza de Citadi (‘via Eleonora’), Terranoa in Pratza Regina Elena de Gaddura, Cuartu Sant’Aleni, Nùgoro e Igrèsias in sas domos comunales.
(GF.P.)
