“Aristanis est domo tua. Tene.la contu”.
Est su tìtulu de sa campagna noa de sensibilizatzione de su Comune de Aristanis, bogada a campu in custas dies dae s’Assessoradu a s’Ambiente.
“A pustis dedicadas sas ùrtimas duas annualidades a sos temas de sa regorta diferentziada, s’atentzione de s’amministratzione s’ispostat a cara a su decoru urbanu chi est unu de sos temas printzipales de s’agenda nostra” annùntziat su sìndigu Massimiliano Sanna.
“Su Comune in su 2020 at detzìdidu de aviare una campagna de comunicatzione subra de sos temas de sa difesa de s’ambiente – ispiegat s’assessora Maria Bonària Zedda -. Amus mòvidu dae sa regorta diferentziada ca fiat pretzisu de imbàtere a s’obietivu de s’80% e gràtzias a s’agiudu de sa gente bi semus imbàtidos: onni mese tenimus pertzentuales intre s’82 e s’85%, chi nos ponent in mesu de sos comunes cabu de logu prus virtuosos de Itàlia. Como cherimus fàghere unu passu in prus, chi nos permitat de nàrrere chi Aristanis est una tzitade neta”.
Su dibàtidu in contu de su decoru urbanu lassat campu a ideas diferentes. S’Assessoradu a s’Ambiente cheret aviare unas cantas atziones chi agiuent a lu megiorare, comintzende dae una campagna de sensibilizatzione chi movat sas cussèntzias. Sa punna est de impreare una comunicatzione chi fatzat de puntòrgiu pro chi sa gente leet cussèntzia de sa chistione in manera crara, in contu de su rispetu de sa tzitade, de sas fratziones e de sos logos abertos. Un’invitu forte pro evitare e cundennare sos cumportamentos intziviles, illegales e chi non rispetant sa tzitade, causende degradu a s’immàgine tzivile e sotziale”.
“Est craru chi ischimus chi b’at ite de fàghere meda pro megiorare sa màchina de s’igiene urbana – agiunghet s’assessora Zedda -. Onni die nos cunfrontamus cun sos ufìtzios e cun sa dita Fòrmula Ambiente pro cumprèndere ite fàghere. Dae pagu amus crèschidu su nùmeru de carreras pro sa mundadura mista, mecanizada e manuale. Lu semus isperimentende in carrera Puccini e in carrera Fìgoli, in ue si faghet su primu sàbadu e su de tres lunis de su mese. Sa resurtada est bona, ma inoghe puru pedimus agiudu a sa gente pro chi rispetet sos divietos de sosta alternada in sa die chi sas màchinas sunt traballende”.
Si faeddat meda finas de sa presèntzia de sos istèrgios de s’arga in logos nevràlgicos de sa tzitade. Sa dita at fatu unu tzensimentu: bi nd’at 400, e onni die sunt prenos de bustas de arga sena diferentziare. In prus de su decoru, su fatu de isbagantare cussos cuntenidores est traballu in prus pro sos dipendentes de Fòrmula Ambiente, chi non podent èssere mandados a fàghere àteru.
(GF.P.)
