Sa tzitade sarda chi at tentu una crèschida prus lestra de s’edade mèdia in sos ùrtimos 20 annos est Aristanis. Est su chi essit dae sos datos Istat in contu de populatzione, chi narat chi a dies de oe s’edade mèdia de sos residentes est de 49,5 annos, crèschida de 8,6 annos contra a su 2002.
Sa tzitade de Lionora est sighida dae S’Alighera, chi at bidu s’edade mèdia de sos residentes passada dae 41,8 in su 2002 a 49,1 in su 2022. S’edade mèdia de sos nugoresos est crèschida de 9,3 annos, ma s’edade mèdia atuale est prus bassa de sa de Aristanis e de S’Alighera: 48,2.
Sa tzitade sarda cun s’edade mèdia prus arta est Casteddu, in ue imbatet a 50,3. Però sa crèschida pro Casteddu est istada prus bassa in sos ùrtimos 20 annos, ebbia 6,8 annos in prus. Tàtari est passada dae 40,5 a 47,8 e Terranoa dae 38,5 a 44,5.
Su datu de Aristanis no ispantat si si tenet contu chi sa tzitade sighit a pèrdere abitantes e chi, tenende contu de sos datos de su 2021, sa diferèntzia intre nàschidos e mortos in tzitade est de -183.
Finas dae pagu, in un’indàgine fata dae su cuotidianu econòmicu “Il Sole 24 Ore” chi analizat sa calidade de sa vida, sa zona de Aristanis at otentu sa màllia niedda finas in su setore “demografia e sotziedade”. Sa provìntzia nch’est calada a su de 103 postos, perdende 2 positziones contra de s’annu in antis. Sas variàbiles analizadas fiant sa pertzentuale de nàschidos (-6,1%) e s’indicadore de betzesa 0,1%).
(GF.P.)
