Sa provìntzia de Aristanis est sa de tres in Itàlia pro nùmeru de giòvanos disocupados: lu narat su raportu nou “Neet tra disuguaglianze e divari. Alla ricerca di nuove politiche pubbliche”, nàschidu dae su traballu de Cgil e Action Aid.
Sos ùrtimos datos disponìbiles regortos finas a su 2020 narant chi su 15,3% de sos giòvanos de sa zona de Aristanis intre sos 15 e sos 34 annos intrant in sa categoria de sos “neet”, nùmene chi pro s’Istat inditat sos giòvanos chi non tenent traballu (mancu cada tantu), non nde sunt chirchende e non sunt disponìbiles a nde comintzare unu intro de pagu tempus.
Nùmeros peus de custos bi nde tenent ebbia sas provìntzias de Messina (22,8%) e Foggia (17,8%).
S’Itàlia est sa chi tenet prus “neet” inativos in Europa, chi non sunt chirchende traballu nen sighende perunu percursu de formatzione.
In su 2020 b’at istadu prus de 3 milliones de neet, màssimu intre sas fèminas (1,7 milliones) e màssimu in su meridione chi tenet pertzentuales dòpias a cunfrontu de su nord de Itàlia.
(GF.P.)
