A pustis de sa proposta de s’assessore a sa Cultura Massimiliano Sanna, sa Giunta comunale de Aristanis at deliberadu de partetzipare a su progetu regionale pro creare itineràrios de turismu religiosu.
“Sos itineràrios religiosos sunt una parte importante de su turismu pro fàghere connòschere sa cultura de su territòriu nostru”, narat su sìndigu Andrea Lutzu ispieghende chi podent crèschere su turismu finas in tempos de pagu movimentu. Su prus de sa gente, difatis, benit a Sardigna in istiu ebbia o in tempus de carrasegare, imbetzes custos “Itineràrios de s’ispìritu” podent creare turismu finas in àteros perìodos.
S’idea est nàschida in su 2012 e sa Regione at creadu unu registru ufitziale. In su 2016 s’assòtziu “100 Turres” de Ceraxius at creadu s’itineràriu “Caminu de sas 100 turres” pro si candidare a rapresentare sa Sardigna in su panorama internatzionale.
Unu de sos puntos importantes in custu itineràriu at a èssere sa turre de Turremanna, dae in ue at a mòvere s’itineràriu a cara a sa Sea de Aristanis, a su Cristos de Nicodemu, a su Monastèriu de su Càrmene, a sa Basìlica de su Remèdiu, etc. Non sunt pagos sos benes culturales de Aristanis, e in custa tzitade sa cultura religiosa est istada semper importante meda.
“S’Amministratzione comunale ischit s’importàntzia chi tenet su patrimòniu artìsticu de Aristanis – narat s’assessore a sa Cultura Massimiliano Sanna – e intrende in custu “Caminu” podet fàghere connòschere mègius su patrimòniu culturale locale. Dae custa initziativa nd’at a tènnere profetu finas s’economia”.
Su “Caminu de sas 100 Turres” imbatet a totu sa Sardigna. Sunt 1.284 chilòmetros divididos in 8 “Caminos” printzipales chi tenent comente riferimentu sas turres costieras chi dant su nùmene a s’initziativa. Si podent bìere panoramas de mare, logos de monte, biddas antigas e logos chi tenent un’importàntzia manna in s’aspetu istòricu religiosu de su Comune de Aristanis.
Su caminu cumpletu est divididu in 70 tapas chi si podent fàghere a pee, in bitzicleta, a caddu o de àtera manera, ponende.bi dae sas 45 a sas 60 dies.
(GF.P.)
