A pustis de sa bona resurtada de sa 1° editzione, torrat su Fèstival de sa cultura sarda “Arrèxini” (Radici), chi tenet s’iscopu de fàghere promotzione a sa literadura, a s’arte tzinematogràfica e a sas atividades teatrales de sas dies de oe impreende su sardu e sas àteras limbas de Sardigna.
Su fèstival si faghet su 10, 11 e 12 de làmpadas in Ussaramanna e su 17, 18 e 19 de làmpadas in Biddanoa de Forru.
Promòvidu dae sos Comunes de Biddanoa de Forru e de Ussaramanna cun s’agiudu de Fondatzione Sardigna e de s’Assessoradu a sa Cultura de sa Regione Sardigna e cun s’organizatzione de s’Assòtziu Entes Locales pro s’Ispetàculu, su Fèstival “Arrèxini” punnat a mustrare cantu sa limba e sa cultura sarda nch’intrant a intro de sa gente ponende raighinas e andende a fundu.
“Arrèxini” – narat Marco Sideri sìndigu de Ussaramanna – pro nois est un’ocasione de importu pro pònnere in evidèntzia s’importàntzia de s’identidade culturale nostra. S’obietivu est de dare unu momentu de cunfrontu e de disaogu chi diat a sa gente de onni edade sa possibilidade de apretziare sa cultura sarda”.
Sa manifestatzione tenet sa diretzione artìstica de Tore Cubeddu e est un’apuntamentu de calidade, prenu de mùsica, laboratòrios linguìsticos, dibàtidos e rebotas cun màndigos tìpicos.
Argumentu importante in custa segunda editzione est su profetu chi nde podet bènnere dae sas “contaminatziones” culturales intre sas minorias.
Programma in Ussaramanna:
Chenàbura 10
h 18,30 in biblioteca: presentatzione de s’ùrtimu libru de Peppe Coròngiu;
h 21,00 in “Casa Accalai”: cuntzertu-letzione “Cuncòrdia a launeddas” curadu dae s’assòtziu Symponia e, a pustis, cuntzertu de Randàgiu Sardu.
Sàbadu 11
h 18,30 in biblioteca: dibàtidu “Bilinguismu in iscola” coordinadu dae Antonello Garau. Bi leant parte Isabella Tore, Miriam Mereu e Antonella Sorace;
h 21 in “Casa Accalai”: presentatzione progetu “Modas” chi amparat su cantu a tenore. Faeddant Diego Pani e Bustianu Pilosu; sa parte musicale est curada dae sos assòtzios Sòtziu Tenores Sardigna e Boches a tenore. A pustis, cuntzertu blues in limba tabarchina de Matteo Leone.
Domìniga 12
h 18,30 in biblioteca: resurtados de su laboratòriu de tzìnema pro giovaneddos (curadu dae Stefano Cau e Maurizio Loi);
dae sas h 21,00 in sa corte interna de “Casa Zedda”: proietzione de bator cortometràgios.
In Biddanoa de Forru
Chenàbura 17
h 18,30 in biblioteca: mesa tunda pro faeddare de sas limbas de minoria. Reladores Sabrina Rasom, Leo Rielli e Leo Virgili. Coòrdinat Tore Cubeddu;
h 21,00 in pratza Costitutzione: cuntzertu de Beppe Dettori e, a pustis, cuntzertu de Bujumannu cun Sista Namely e Isla Sound.
Sàbadu 18 de làmpadas
h 18,30 in biblioteca: mesa tunda pro faeddare de sa “Carta de Montarbu”, un’initziativa chi punnat a dare unu coordinamentu unitàriu de su Movimentu Linguìsticu;
h 21,00 in pratza Costitutzione: “Grazia, la madre”, cuntzertu de Claudia Crabuzza e Chichimeca dedicadu a Gràtzia Deledda. A pustis, cuntzertu de Drumlanduo.
Domìniga 19 de làmpadas
h 18,30 in biblioteca: resurtados de su laboratòriu de tzìnema pro giovaneddos (curadu dae Stefano Cau e Maurizio Loi);
h 21,30 in pratza Costitutzione: projetzione de su film “Àrbores” de Francesco Bussalai, chi faeddat de su contu ismentigadu de sas àrbores in Sardigna
Su programma cumpletu, cun sos inditos finas de sos logos in ue si podet mandigare, l’agatades in custu link.
(GF.P.)
