Motorola at presentau su primu smartphone con interfàcia ladina, fatu a manu de pari cun Lenovo Foundation, sa Lìbera Universidadi de Bolzano e s’Istitutu ladinu Micurá de Rü. Custa initziativa tenit sa punna de amparai is minoràntzias linguìsticas chi arriscant de si sperdi e duncas est de importu mannu po tramandai e mantenni bias is culturas de is pòpulus chi ddas chistionant.
Arregordaus ca su ladinu, cumenti a su sardu, est una de is doxi lìnguas de minoria arreconotas in Itàlia; a di de oi ddu chistionant in Val Badia e Val Gardena (Alto Adige); in Val di Fassa (Trentino); a Livinallongo e Ampezzo (Belluno) e in su Cantoni dei Grigioni, in Svizzera. Nci sunt giai lìburus, vocabolàrius, giornalis in ladinu (Usc di Ladins), programmas in ràdiu e in televisioni (Rai Ladinia e Tca), e su ladinu si imparat fintzas in scola, ma de siguru a ddu àiri postu in su smartphone, at a èssiri una faina chi at a agiudai de prus ancora a afortiai custa lìngua.
«A tènniri su ladinu in su telèfunu, biu cantu ddu portaus ònnia dii, est de importu mannu, at acrarau Paul Videsott, docenti de filologia romanza in sa Lìbera Università de Bolzano, e chi at ghiau sa truma de tradutoris e revisoris.
Tocat a marcai su fatu ca ònnia duas cidas, sparessit una lìngua. S'atlanti interativu de is lìnguas de su mundu chi sunt in perìgulu, aprontau dae s'Unescoo, ammostat ca is lìnguas chi sunt rischendi de non sighiri a bivi sunt sèmpiri de prus, annu po annu. Prus de su 45% de is 7000 lìnguas de su mundu sunt in perìgulu.
