Sunt abertos sos tèrmines de su bandu “Nidi Gratis” pro presentare domanda de contributu pro parare fronte a sas ispesas de frecuèntzia in sos asilos “niu” e “micro-niu” pùblicos o privados pro sos meses de cabudanni-santugaine 2022.
Podent presentare domanda de contributu pro su primu perìodu (ghennàrgiu-trìulass 2022) finas sas famìllias chi no ant mandadu o cumpletadu sa domanda intro de su tèrmine prevìdidu. In cussu casu, sas richiestas s’ant a atzetare cun riserva e su pagamentu eventuale de su contributu s’at a fàghere finas a finire su dinari.
S’assessora a sos Servìtzios sotziales Alessandra Porcu ammentat chi “sa misura “Nidi Gratis” previdet unu contributu màssimu de 200 èuros a su mese pro unu tempus màssimu de 11 meses, valutadu in duos grupos ISEE, pro agiuare a minimare s’ispesa integrende su “bonus nido” INPS. Si prevident duos perìodos de tempus: su primu pro sos pitzinnos chi andant a sos “nios” dae su mese de ghennàrgiu a su mese de trìulas 2022 e su segundu pro su sos meses de cabudanni-nadale 2022”.
Podent presentare domanda sos nùcleos familiares (mancari cun unu genitore ebbia) e finas sas famìllias “di fatto”, chi tèngias sos tìtulos chi sighint:
- tèngiant unu o prus fìgios in càrrigu fiscale, de edade intre zero e tres annos (duos annos e 365 dies), finas adotados o in afidamentu;
- apant presentadu a s’INPS s’ISEE 2022 pro sas prestatziones indiritzadas a sos minorennes de su nùcleu familiare;
- apant presentadu sa domanda pro su “Bonus Nidi INPS”. In casu chi non fatzat a atestare s’idoneidade e su contributu de su “Bonus Nidi INPS” sa domanda si retzit cun riserva e si ponet in graduatòria, assignende su massimale prevìdidu.
Su bandu cumpletu est publicadu in su situ istitutzionale (https://www.comune.oristano.it/it/documenti/documento/Nidi-Gratis-Entro-il-10-febbraio-le-domande-per-i-contributi-per-il-periodo-settembre-dicembre-2022/).
Sas domandas, cumpiladas in sa modulìstica apòsita, cherent mandadas intro de sa una (h 13,00) de su 10 de freàrgiu 2023 cun posta eletrònica mandada a s’indiritzu protocollo@comune.oristano.it o a sa pec istituzionale@pec.comune.oristano.it.
Cherende si podet mandare finas in posta ordinària o cunsignare manu pro manu in su Protocollu de su Comune in Pratza de Citadi (piazza Eleonora) n° 25.
“Su contributu – ispiegat s’assessora Porcu – si podet aunire a sos agiudos dados a chie andat a sos asilos “niu” pùblicos e privados e si dat a sos nùcleos familiares in ue s’ISEE non sobrat sos 40mìgia èuros. Custu interventu no impedit de retzire àteros agiudos dados pro permìtere de pònnere paris traballu e netzessidades familiares comente sos servìtzios de baby sitting, e si podet pedire pro onni pitzinnu minore de sa famìllia, chi no apat cumpridu sos tres annos”.
Pro cale si siat informatzione si podet iscrìere a s’indiritzu e-mail primainfanzia@comune.oristano.it o telefonare a sos ufìtzios comunales a sos nùmeros 0783 – 791236 - 328- 2941711 dae su lunis a sa chenàbura in oràriu 9,00-13,00.
(GF.P.)
