S’Agentzia pro sa Cyberseguresa Natzionale (ACN) at bogadu a campu un’atacu de sos piratas informàticos contra de sos server Vmware ESXi. A su chi narat s’Agentzia, custu atacu pertocat totu su mundu dae sa Finlàndia a sos Istados Aunidos e su Paisu prus penalizadu est sa Frantza.
Su Guvernu est sighende sa situatzione e custu mangianu a sas 9 su sutasegretàriu Alfredo Mantovano, autoridade delegada pro sa cybersicurezza, s’at a bìere in Palazzo Chigi cun Roberto Baldoni diretore de ACN e cun Elisabetta Belloni diretora de su Dipartimentu Informatzione e Seguresa (DIS) pro cumprèndere ite dannos b’at istadu e pro pensare a unu pranu de difesa.
“In sas chidas coladas – si leghet in su comunicadu de imprenta de Palazzo Chigi – sa netzessidade de cuntrastare sa debilesa de sos sistemas informàticos fiat istada ogetu de un’informativa de su presidente Giorgia Meloni in su Cussìgiu de sos ministros, acumpangiada dae s’invitu a un’acordu intre istruturas istitutzionales e ACN”.
A su chi narat ACN, in Itàlia sos chi ant averiguadu atacos informàticos sunt meda, e sos analistas pensant chi su nùmeru at a crèschere. Prus a in antis est possìbile chi b’apat atacos de programmas malignos chi criptant sos sistemas e non permitint de los impreare finas a su pagamentu de unu riscatu.
In sas oras coladas b’at istadu problemas mannos in sa rete Tim siat in sa zona de Aristanis siat in zona de Terraba. Paret chi como su problema siat risòlvidu e s’azienda at pedidu iscusa pro s’istorbu.
(GF.P.)
