Dae beranu a s’atòngiu, ma su prus in s’istiu, cando si andat a su sartu ma fintzas in sos ortos e giardinos, tocat a dare atentu a s’errìghina, bobboi chi podet èssere perigulosu meda pro sa salude de sas persones e de sos animales. S’errìghina bivet in ue b’at erba e molas e preferit sos giassos in ue b’at bestiàmene e animales ca si nutrit de su sàmbene issoro ma fintzas de cussu de s’òmine.
Su perìgulu pro sa salude de s’òmine est ca podet atacare maladias malas, comente pro nàrrere s’entzefalite, si in antis at sutzadu sàmbene infetadu.
Sa cosa mègius de fàghere est una preventzione bona, chirchende de no èssere puntos mancari ponende in sa pedde ismuntada o in pitzu de bestires e iscarpas sustàntzias repellentes leadas in sa potecaria; bestende∙si de colore craru, a mànigas longas e cun cartzones longos, cun sos burtzitos, cambutzos e tzugru serrados; evitare de passare in ue s’erba est arta o, si faghet, fintzas de dda tocare. E ancora, cando si fùrriat a domo, est bene a si abbaidare e a si compidare in totu sa persone, compidare sas bestimentas pro ochire s’errìghina si bi nd’at.
Cando un’errìghina punghet, tocat – si faghet - a nde dda chirrare luego ca prus abarrat atacada e prus podet atacare sas maladias.
S’errìghina non si depet tocare cun sa manos nuas, su consìgiu est de si pònnere sos guantes e de non da fàghere istacare cun su calore o sustàntzias comente alcol, ògiu, ammonìaca o àteru; in antis de incomintzare, comente a pustis, tocat a disinfetare sa pedde (atentzione a sas sustàntzias chi podent mantzare e non faghent bìere sas mantzas eventuales de un’infetzione). S’errìghina cheret leada cun una pintzeta, su prus acanta chi faghet a sa pedde, tirende e girende a bellu a bellu, sentza carcare su bobboi ca si ddi essit cosa dae sa buca podet èssere de prus s’arriscu chi atachet maladias; si abarrat calicunu cantigheddu de errìghina atacadu tocat a nde ddu bogare cun un’agu istèrile. S’errìghina cheret morta e est mègius a dda brusiare. Pro una pariga de dies si depet pònnere una crema cun tetratzìcline, mancari a pustis de àere faeddadu cun su dotore.
(MM)
