Est publicadu s’avisu pro ativare sos progetos de aprendistadu “Garanzia Giovani” destinados a giòvanos “NEET” (Not in Education, Employment or Training, est a nàrrere giòvanos dae sos 18 a sos 29 annos chi non sunt nen traballende ne istudiende o formende·si de peruna manera).
Su programma previdet chi sas aziendas potzant leare sos giòvanos a traballare retzende bonus e agiudos pro s’addestramentu, sos cuntratos de imparu o pro mudare s’aprendistadu in cuntratu de traballu.
Pro sos giòvanos chi si cherent pònnere in pròpiu b’at ainas apòsitas pro pòdere otènnere su crèditu, e si podent visionare in sa setzione “Giovani” de su situ dedicadu.
Sos giòvanos chi risiedint in Sardigna e in su Meridione de Itàlia tenent carchi agevolatziones in prus: intantu s’edade pro partetzipare est illonghiada finas a 34 annos. In prus, podet intrare in su programma finas chie frecuentat unu cursu de formatzione o istrutzione e, pro more de sas initziativas de s’Asse 1bis, finas sena adesione formale, comente est ispiegadu in su situ www.ticonsiglio.com, chi dat inditos finas pro comente fàghere sa domanda pro aderire a su progetu.
S’aprendistadu si podet fàghere in sas aziendas chi tenent nessi una sede operativa in Sardigna, e custa devet èssere in règula cun sos tìtulos pedidos dae s’avisu. Est prevista un’indennidade de 450 èuros a su mese pro sos giòvanos NEET e 650 pro sos NEET disàbiles (ex lege 381/91).
Sos progetos si podent presentare dae su 22 de austu a su 10 de santugaine e totu sos documentos si podent iscarrigare intrende in su link de sa Regione Sardigna.
Chie tenet carchi duda, podet incarcare in sa pàgina de sas FAQ (sas preguntas prus comunes) de su situ dedicadu.
(GF.P.)
