URASANNA – Bidda antiga de orìgini medievali chi faiat parti de su Giudicau de Arbarei, in sa Curadoria de Milis.
S'agatàt in su sartu chi immui est de Sabarussa.
Sa bidda fiat bastanti losana movendi de su de XII sèculus, ma po mori de sa pesta iat sunfriu meda e apustis de su 1350 sa populatzioni si nci fiat andada.
URRI – Bidda antiga de orìgini medievali chi faiat parti de su Giudicau de Arbarei, in sa Curadoria de Guilcer.
S'agatàt in su sartu chi immui est de Ilartzi.
Apustis is conchistas aragonesas, inghitzadas is gherras intra de Aragona e Arbarei, est stètia logu de operatzionis militaris e iat tentu dannu mannu.
Po custa arraxoni in antis de acabbai su de XIV sèculus sa populatzioni iat lassau sa bidda.
VILLALONGA – Bidda antica de orìgini pùnicu-romana chi faiat parti de su Giudicau de Arbarei in sa Curadoria de Campidanu Majori.
S'agatàt in su sartu chi immui est de Nuraxinieddu e Siamajore.
Arrutu su Giudicau, in su 1410 dda iant posta me in is terras de su marchesau de Aristanis cuncèdiu a Leonardu Cubello. Me in is sèculus infatu iat cumpartziu is fatus de su fèudu e candu custu ddu iant confiscau a Leonardu Alagon, movendi de su 1479 dda amministràt inderetura su funtzionàriu reali.
In su sèculu XVII in tempus de dificultadi is bividoris de Villalonga dda iant lassada fuendi-nci a Sabarussa. In su XVIII iant tentau de torrai a abiatzai sa bidda ma sena de resurtau.
CANDALA – Bidda antiga de orìgini medievali chi faiat parti de su Giudicau de Arbarei, in sa Curadoria de Barigadu. Est de crei ca sa genti sua si nci fiat fuida de sa bidda in su 1376 po mori de sa pesta.
Novas pigadas de “Enciclopedia della Sardegna”
