CRACÀRGIA (o Cargi) - Bidda antiga de orìgini medievali chi faiat parti de su Giudicau de Arbarei, in sa Curadoria de Parte Montis.
S'agatàt in su sartu chi immui est de Mòguru.
Apustis de sa conchista aragonesa, sa bidda iat sunfriu meda de sa gherra intra de Aragona e Arbarei. In antis de su sèculu XIV non ddui iat prus genti.
GOZULA - Bidda antiga de orìgini medievali chi faiat parti de su Giudicau de Arbarei, in sa Curadoria de Parte Montis.
S'agatàt in su sartu chi immui est de Sìmaba.
Sa genti sua biviat beni e sulena sighendi sa sorti de su giudicau. Eligiat cussa puru su “majore” suu. Po nexi de sa pesta iat pèrdiu parti manna de sa populatzioni sua. Si fiat spèrdia in totu a s'inghitzu de su sèculu XV.
ALMOS - Bidda antiga chi faiat parti de su Giudicau de Arbarei, in sa Curadoria de Parte Montis.
Iat inghitzau a si sperdi giai in su 1348 e acoa at sighiu in su 1378 po nexi de sa pesta. In su 1388 is rapresentantis suus iant pigau parti a is atòbius de is “coronas” chi iant fatu in antis de sa paxi cun s'Aragona. De insaras is bividoris suus dda iant lassada in totu.
TAMIS – Bidda antiga est de crei s'orìgini sua romana. Faiat parti de su Giudicau de Arbarei, in sa Curadoria de Parte Montis.
S'agatàt in su sartu chi immui est de Masuddas.
In sa primu parti de su sèculu XIV su giùixi de Arbarei iat agiudau a ndi pesai un'abbadia vallombrosana. Arrutu su giudicau, apustis de su 1409 fiat intrada a fai parti de su Regnum Sardiniae e is funtzionàrius de su rei de Aragona dda amministrant. In antis de su 1430 nci dda iant posta me in is terras donadas a fèudu a Leonora Manrique candu si fiat cojada cun Berengariu Bertran. In custu modu faiat parti de sa contea de Quirra, ma in su sèculu XV iat inghitzau a si spersi. Candu acoa s'abbadia vallombrosana iat acabbau s'atividadi sua, is bividoris iant lassau in totu sa bidda aintru de s'acabbu de su sèculu XVI.
MÀRGINI - Bidda antiga de orìgini medievali chi faiat parti de su Giudicau de Arbarei, in sa Curadoria de Parte Montis.
S'agatàt in su sartu chi immui est de Mragaxori.
Apustis de sa pesta de su 1348 e 1376 sa populatzioni cosa sua iat inghitzau a si sperdi e in antis de s'acabbu de su sèculu XIV sa bidda non nci fiat prus.
PARDU - Bidda antiga chi faiat parti de su Giudicau de Arbarei, in sa Curadoria de Parte Montis.
Non si cumprendit in cali sartu fiat.
Apustis de sa conchista aragonesa, sa bidda iat sunfriu meda de sa gherra intra de Aragona e Arbarei. In antis de su sèculu XIV non ddui iat prus genti.
Novas pigadas de “Enciclopedia della Sardegna”
