ALARI – Bidda antiga chi faiat parti de su Giudicau de Arbarei, in sa Curadoria de Barigadu.
S'agatàt in su sartu chi immui est de Àllai in localidadi Planu Alisa pagu atesu de sa bidda.
Non si sciit giai nudda de sa bidda sarvu chi, segundu a Aggius is bividoris suus dda iant lassada andendi a sa bidda de Àllai.
BARBAGIANA o BARBARIANA – Bidda antiga, est de crei de orìgini romana (Barbaria ianua) chi faiat parti de su Giudicau de Arbarei, in sa Curadoria de Barigadu.
S'agatàt in su sartu chi immui est de Àllai.
In su 1388 contàt 40 bividoris.
In su sèculu XIV sa genti sua iat inghitzau a dda lassai andendi-si-nci a Àllai, finas a si sperdi in totu a s'inghitzu de su sèculu infatu.
LODDU – Bidda antiga chi faiat parti de su Giudicau de Arbarei, in sa Curadoria de Barigadu.
S'agatàt in su sartu chi immui est de Fordongianus in localidadi Lodue (Pranu Loddu) pagu atesu de sa bidda.
In su 1388 contàt 32 bividoris.
Sa bidda iat sighiu is sortis de su Giudicau e apustis s'arruta sua, in su 1410 faiat parti de su Regnum Sardiniae ma sa populatzioni sua fiat abarrada contras a is Aragonesus, in su 1412 fiat intrada a fai parti de su territòriu chi su visurei iat donau a su marchesu de Aristanis a afiàntzia de unu crèitu chi custu ùrtimu teniat avatu de s'Amministratzioni reali. Sigumenti su rei non si fidàt de su marchesu in su 1417 Loddu faiat parti de su fèudu donau a Ludovicu Pontons, po custa arraxoni sa populatzioni sua, non praxada, iat inghitzau a lassai sa bidda e candu in su 1425 Ludovicu Pontons iat bèndiu sa bidda a su marchesu de Aristanis sa bidda oramai contàt pagu bividoris. Mortu Leonardo Cubello sa bidda faiat parti de totu is terras lassadas a su segundu fillu Sarbadori. A bellu a bellu sa bidda si fiat spèrdia in totu.
MODDÀMENE – Bidda antiga de orìgini medievali chi faiat parti de su Giudicau de Arbarei, in sa Curadoria de Barigadu.
S'agatàt in su sartu chi immui est de Busache acanta de sa crèsia de Santa Susanna.
Movendi de su sèculu XIV sa populatzioni sua iat inghitzau a si sperdi est de crei po nexi de sa pesta de su 1348 e de cussa de su 1376.
In su 1388 contàt agiomai 32 bividoris e a s'acabbu de su sèculu si fiat spèrdia in totu.
MONTESANTO o MONTESANCTO – Bidda antiga est de crei de orìgini pùnicu-romana,chi faiat parti de su Giudicau de Arbarei, in sa Curadoria de Barigadu.
S'agatàt in su sartu chi immui est de Nughedu Santa 'Itòria.
In cussu territòriu s'agatàt una fortesa pùnica-romana e acanta sua ndi iant pesau una crèsia bizantina. Sa bidda si fiat spaniada acanta de cussa. In su sèculu XII dda iant donada a is Camaldolesus ma in su sèculu XIII si fiat spèrdia in totu.
MONTESANTO JOSSO o MONTI - Bidda antiga chi faiat parti de su Giudicau de Arbarei, in sa Curadoria de Barigadu.
S'agatàt in su sartu chi immui est de Neoneli.
Sa populatzioni sua iat inghitzau a si sperdi in su sèculu XIV, in su 1388 contàt 28 bividoris e pagu apustis non nci fiat prus.
SORRAI o LORRAI - Bidda antiga de orìgini medievali chi faiat parti de su Giudicau de Arbarei, in sa Curadoria de Barigadu.
S'agatàt in su sartu chi immui est de Neoneli.
Fiat connota giai de su sèculu XI. In su 1388 contàt 48 bividoris e apustis s'arruta de su Giudicau in sa primu metadi de su sèculu XV si fiat spèrdia in totu.
UROSOLO o OSSOLO – Bidda antiga chi faiat parti de su Giudicau de Arbarei, in sa Curadoria de Barigadu.
S'agatàt in su sartu chi immui est de Bidoniu. Si fiat spèrdia in totu is su sèculu XIV.
Novas pigadas de “Enciclopedia della Sardegna”
