FENONI – Bidda antiga de orìgini medievali chi faiat parti de su Giudicau de Arbarei, in sa Curadoria de Campidanu Majori.
S'agatàt in su sartu chi immui est de Arriora.
Sa bidda fiat bastanti losana ma si fiat giai spèrdia in sa segunda metadi de su sèculu XIV incapat po nexi de sa pesta de su 1376. De insaras su sartu suu si ddu certànt sa genti de Arriora e Santeru
GIPPA - Bidda antiga est de crei de orìgini pùnica chi faiat parti de su Giudicau de Arbarei, in sa Curadoria de Campidanu Majori.
S'agatàt in su sartu pagu atesu de Donigala Fenughedu, in sa localidadi chi oi est Pauli.
Si fiat svilupada in unu de cussus populaus nàscius acanta de Tharros. In su sèculu XIV sa genti sua dda iat lassada incapat po nexi de sa pesta de su 1376.
PISCÒPIU – Bidda antiga est de crei de orìgini pùnica-romana chi faiat parti de su Giudicau de Arbarei, in sa Curadoria de Campidanu Majori.
S'agatàt in su sartu chi immui est de Arriora. Sa pesta de su 1376 dda iat ferta meda e de insaras sa genti fiat sèmpiri prus pagu tantu eest berus ca in su sèculu XV in sa bidda non ddui iat prus genti.
SINIPALE – Bidda antiga de orìgini medievali chi faiat parti de su Giudicau de Arbarei, in sa Curadoria de Campidanu Majori.
Non si cumprendit beni anca fut, ma at tentu sa pròpia sorti de is àtera biddas arremonadas, de losana chi fut s'est spèrdia in su sèculu XIV po nexi de sa pesta de su 1376.
SINUSKI/SENUSCHI - Bidda antiga de orìgini pùnica-romana chi faiat parti de su Giudicau de Arbarei, in sa Curadoria de Campidanu Majori.
S'agatàt in su sartu chi immui est de Nurachi, in su logu chi si tzèrriat Pauli Sa Nuschi. In su 1388, apustis sa pesta, contàt 28 bividoris. Arrutu su Giudicau de Arbarei fiat intrada a fai parti de su Regnum Sardiniae e in su 1410 fiat in su Marchesau de Aristanis cumpartzendi-ndi sa stòria sua finas a sa confisca sua a Leonardu Alagon in su 1477. Acoa dda amministràt inderetura su funtzionàriu reali. In su sèculu XVI Is bividoris suus si fiant defensaus de unas cantu afracadas de is corsarus barbariscus chi fiant intraus a Campidanu. Ma in su sèculu XVII aintru de su 1633 is bividoris suu iant decidiu de si nci andai in totu.
Novas pigadas de “Enciclopedia della Sardegna”
