BOELE – Bidda antiga de orìgini medievali chi faiat parti de su Giudicau de Arbarei, in sa Curadoria de Guilcer.
S'agatàt in su sartu chi immui est de Tadasuni, in localidadi Santa Maria.
Sa populatzioni sua iat inghitzau a si sperdi apustis de sa pesta de su 1376. In su 1378 dda iant posta me in is territòrius giudicalis chi su rei de Aragona iat cuncèdiu a fèudu a su traitori Valore de Ligia, ma in beridadi sa bidda iat sighiu a abarrai in possa de su giùixi. Arrutu su Giudicau de Arbarei fiat intrada a fai parti de su Regnum Sardiniae ma sa populatzioni fiat contras a is bincidoris e si fiat furriada candu in su 1415 is De Ligia(s) iant tentau de fai balli is deretus insoru. In su 1420 la bidda fiat passada a Leonardo Cadello ma sa populatzioni sua fiat, oramai, pagu meda, po tanti Boele si fiat sboidada in totu in sa primu metadi de su sèculu.
BORZACHERI - Bidda antiga de orìgini medievali chi faiat parti de su Giudicau de Arbarei, in sa Curadoria de Parte Ocier (Guilcer).
Non si cumprendit beni anca fiat.
In su sèculu XIV iat sunfriu meda de is dannus de sa pesta de su 1376, tantu est berus ca in su 1388, in s'àutu de paxi de Seddori, sa bidda contàt 24 bividoris sceti.
LESTINGEDU - Bidda antiga de orìgini medievali chi faiat parti de su Giudicau de Arbarei, in sa Curadoria de Guilcer.
S'agatàt in su sartu chi immui est de Boroneddu.
Sa genti sua iat biviu sulena finas a su sèculu XIV, mancai ddui fessit sa gherra intra de Arbarei e Aragona, ma in cussu sèculu etotu iat inghitzau a si sperdi, de seguru po nexi finas de sa pesta de su 1376, in su 1388 in s'àutu de paxi de Seddori resurtàt giai sena de genti.
LIGHEI - Bidda antiga de orìgini medievali chi faiat parti de su Giudicau de Arbarei, in sa Curadoria de Guilcer.
S'agatàt in su sartu chi immui est de Sèdilo anca est su nuraxi cun su pròpiu nòmini.
Comenti a Lestingedu, sa genti sua iat biviu sulena finas a su sèculu XIV, mancai ddui fessit sa gherra intra de Arbarei e Aragona, ma in cussu sèculu etotu iat inghitzau a si sperdi, de seguru po nexi finas de sa pesta de su 1376, in su 1388 in s'àutu de paxi de Seddori resurtàt giai sena de genti.
NONI - Bidda antiga de orìgini medievali chi faiat parti de su Giudicau de Arbarei, in sa Curadoria de Guilcer.
Non si cumprendit beni anca fiat posta.
In su 1378 dda iant posta me in is territòrius giudicalis chi su rei de Aragona iat cuncèdiu in fèudu a Valore de Ligia, ma in beridadi sa bidda iat sighiu a abarrai in possa de su giùixi de Arbarei. Sa bidda si fiat spèrdia in totu a s'inghitzu de su sèculu XV incapat po nexi de sa pesta de su 1404.
NORDAI – Bidda antiga, incapat de orìgini bizantina chi faiat parti de su Giudicau de Arbarei, in sa Curadoria de Guilcer.
S'agatàt in su sartu chi immui est de Sèdilo. Si fiat spèrdia in su sèculu XIV incapat po nexi de sa pesta de su 1376.
ORENA - Bidda antiga de orìgini medievali chi faiat parti de su Giudicau de Arbarei, in sa Curadoria de Guilcer.
S'agatàt in su sartu chi immui est de Ilartzi.
Fiat una bidda prena meda de genti ma apustis de sa conchista aragonesa is gherras dda iant ferta meda po tanti in sa segundu metadi de su sèculu XIV si fiat spèrdia in totu.
Novas pigadas de “Enciclopedia della Sardegna”
