SELLA – Bidda antiga de orìgini medievali chi faiat parti de su Giudicau de Arbarei, in sa Curadoria de Guilcer.
S'agatàt in su sartu chi immui est de Norghiddo.
Apustis de sa conchista aragonesa iat sighiu a abarrai in possa de su giùixi
de Arbarei. In su 1378 fiat me in is territòrius giudicalis chi su rei de Aragona iat cuncèdiu a Valore de Ligia traitori. Arrutu su Giudicau de Arbarei sa populatzioni sua fiat abarrada contras a is bincidoris e si ddu fiat furriada candu in su 1415 is De Ligia(s) iant provau de fai balli is deretus insoru.
In su 1388 ddui biviant prus o mancu 20 bividoris. Apustis de sa batalla de Seddori in su 1417 a Sella dda iant cuncèdia a fèudu a Barisone Cano chi dda iat bèndia a su Marchesu de Aristanis. Sa bidda si fiat spèrdia in totu pagu annus in fatu.
SUCI - Bidda antiga de orìgini medievali chi faiat parti de su Giudicau de Arbarei, in sa Curadoria de Parte Ocier (Guilcer).
Non si cumprendit beni anca fiat.
A s'inghitzu de su sèculu XIIII sa crèsia sua dda iant donada a is Camaldolesus de Bonàrcadu, de pagu in antis sa bidda si fiat spèrdia.
USTEDU/USCHEI/USTEI - Bidda antiga de orìgini medievali chi faiat parti de su Giudicau de Arbarei, in sa Curadoria de Guilcer.
S'agatàt in su sartu chi immui est de Ilartzi, in su logu de su nuraxi cun su pròpiu nòmini.
In su 1388 contàt prus o mancu 12 bividoris. Sa bidda si fiat spèrdia in totu in su sèculu XIV.
Novas pigadas de “Enciclopedia della Sardegna”
