Una de sas novidades de su Nadale aristanesu 2022 est sa domo de Babbu Nadale: in s’Hospitalis Sancti Antoni dae s’8 a su 24 de nadale mannos e piticos ant a pòdere connòschere a Babbu Nadale.
“S’obietivu est de fàghere crèschere totu sos elementos chi in sa mente de sa gente ammentant su Nadale – ispiegat s’assessore a su Turismu Luca Faedda -. Pro mesu de un’itineràriu acumpangiadu e didàticu, pitzinnos e mannos ant a pòdere visitare sos ambientes de sa Domo de Babbu Nadale, chi los ant a fàghere intrare in sa magia de su Nadale. B’at a èssere s’ufìtziu postale cun sos elfos chi regollent sas litereddas, sa fàbrica de sos giogos, s’aposentu de Babbu Nadale e su giardinu cun s’islita màgica pro dare sos regalos”.
Sa mustra l’ant aberta eris 8 de nadale. S’acumpangiamentu de Babbu Nadale, cun sa banda musicale de Santa Cecìlia e cun sos elfos, at mòvidu dae Pratza de Citadi (‘piazza Eleonora’) a sas 4 e mesa de sero (h 16,30), est passada in su tzentru istòricu e est imbàtida a s’Hospitalis Sancti Antoni in ue ant fatu s’inauguratzione. Sa Domo de Babbu Nadale, cun laboratòrios e atividades de animatzione pro sos pitzinnos, at a èssere aberta finas a sàbadu 24 de nadale in custos oràrios:
dae su lunis a sa chenàbura h 16,00-20,30
sàbadu e domìniga h 10,00-13,00; 16,00-20,30.
Sas vìsitas, de 20-25 minutos, si faghent in grupu e a sa fine sos pitzinnos s’ant a pòdere fàghere una fotografia cun Babbu Nadale e sos elfos e ant a pòdere impostare sa literedda issoro.
Sas vìsitas si podent prenotare in su situ sardegnachristmasvillage.it o in sa billeteria de s’Hospitalis Sancti Antoni.
Dae oe (9 de nadale) sos elfos ant a traballare in sa biddighedda issoro: in sas butegheddas issoro sos pitzinnos ant a pòdere iscrìere litereddas, pintare disignos o partetzipare a su “truccabimbi”.
(GF.P.)
