Dae una deghina de annos sa paràula “microalghe” est essende a pìgiu semper prus a ispissu in sa literadura chi si òcupat de alimentatzione. Sas microalgas nche “suspint” s’anidride carbònica 15 bortas in prus de sas àrbores: pagos metros cuadrados produint ossìgenu cantu 400 àrbores.
Movende dae custos benefìtzios, Gabriele Cipri e Andrea Moro ant creadu “Livegreen”, azienda Bio chi tenet base in Aristanis e chi est sa produidora prus manna de spirulina biològica in Itàlia, impreada pro realizare una cantidade manna de produtos, dae sos hamburger vegetarianos a sas merendinas energèticas.
Gabriele e Andrea sunt traballende in su campu de sas microalgas dae annos meda: Andrea at comintzadu in su 2008 e Gabriele in su 2011. A pustis de tantos annos de chirca in contu de s’impreu de sas microalgas a livellu industriale e alimentare ant detzisu, paris cun àteros sòtzios, de creare Livegreen, divenende su riferimentu in Itàlia pro sas microalgas. Sas aziendas chi produint spirulina sunt pro su prus in Àsia (màssimu Tzina e Ìndia), ma sa calidade est inferiore meda.
Andrea Moro ispiegat chi sa spirulina creschet pro fotosìntesi comente sas àteras prantas, duncas su clima mite de Sardigna agiuat meda sa crèschida de custa microalga. In sos meses prus fritos est caentada in serras pro more de s’energia tèrmica de “iscartu” de unu digestore anaeròbicu pro sa produtzione de biogas. Sa spirulina non finit abba ma impreat ebbia s’abba de evaporatzione.
S’azienda, in custos annos, at chircadu de replicare sas cunditziones de crèschida chi tenet in natura sa spirulina, chi creschet in lagos tropicales de orìgine vulcànica, màssimu in oros de mare in ue s’abba est profunda 20 o 30 cm e abarrat prus caente. “Nois amus fraigadu bartzas artifitziales, in ue b’at undigheddas chi movent sa spirulina e permitint a totu sas tzèllulas de retzire lughe. Pro nde la regòllere faghimus comente faghiant sas fèminas aztecas in su lagu Texcoro: issas filtraiant s’abba birde de oros de lagu cun robba, e nois puru nde seberamus sa spirulina dae s’abba filtrende.la. Issas, a pustis, la poniant a sicare a su caentu ma in s’umbra, in un’ispètzie de tunnel a manera chi su sole no l’esseret privada de sas sustàntzias nutritivas. Nois la sicamus pro mesu de su calore chi benit dae su Biogas.”.
Gabriele e Andrea ant aviadu una campagna de finantziamentu culletivu (chi est andende bene meda) pro agiuare custu protzessu de innovatzione chi pertocat sa produtzione de una fonte protèica noa chi si presentat comente una farina sena colore e sena sabore, chi si podet impreare pro fàghere produtos alternativos a sa petza.
“S’ambitzione nostra – sighit Andrea – est de creare una retza de impresas e de agricultores amparet s’italianidade in sa produtzione, e chi permitat de valorizare sa territorialidade de sas produtziones, comente si faghet a dies de oe in sos mòlinos de s’ògiu in ue onni agricultore nche leat s’olia pro nd’otènnere s’ògiu suo. Gasi Livegreen at a pòdere maghinare sa spirulina e bogare estratos e proteinas pro onni coltivadore”.
(GF.P.)
