Dae su 21 de santandria comintzant sas atividades noas de sa biblioteca comunale de Aristanis.
“Dae lunis 21 de santandria comintzamus cun sos laboratòrios de alfabetizatzione informàtica pro chie tenet prus de 60 annos, sos laboratòrios de intercultura e educatzione a sa mondialidade dedicados a sos surdos, sos laboratòrios de letura pro fèminas istràngias” annùntziat s’assessore a sa Cultura Luca Faedda.
Sas atividades noas movent a intro de su progetu “Biblioteca, una resursa pro sa comunidade”, patrotzinada dae sa Fondazione con il Sud e dae su Centro per il libro e la lettura, paris cun sa sotziedade cooperativa Studio e progetto 2 capu filera de su progetu, cun su Comune de Aristanis, su Comune de Santa Justa e sa Fondazione Oristano. Sos laboratòrios pro fèminas istràngias e pro sos surdos sunt organizados cun s’agiudu de OSVIC.
Sos laboratòrios de alfabetizatzione informàtica, de 10 oras, sunt pro gente chi tenet prus de 60 annos.
“Cherimus dare una panoràmica de sos programmas prus impreados (de càrculu, elaboratzione de testos, browser pro navigare e àteru meda) e de sos trastos pro fàghere sas operatziones prus comunes: imparare a creare unu account de posta eletrònica e comente l’impreare, fàghere chircas in su web, connòschere, creare e impreare su SPID e navigare in sos sitos istitutzionales” ispiegat s’assessore Faedda.
Sos laboratòrios de intercultura e de educatzione a sa mondialidade sunt dedicados a gente chi no intendet. Sos operadores chi los curant ant a èssere agiuados dae s’intèrprete LIS e s’ant a fàghere una borta a sa chida. Onni atopu at a durare 2 oras, pro 24 oras in totu.
Sos laboratòrios de letura pro fèminas istràngias naschent pro megiorare sas cumpetèntzias linguìsticas in unu logu seguru pro imparare e interagire cun àtere.
“Un’àtera atividade est dedicada a sos prus piticos – agiunghet s’assessore Faedda -. Onni martis a merie, a sas 4 (h 16,00), dedicamus unu pagu de tempus a s’initziativa “S’ora de su contu - L’ora del racconto”, cun leturas pro pitzinnos dae sos 6 a sos 9 annos”.
“Totu sos interventos – finit s’assessore a sa Cultura – sunt fatos pro agiuare sas categorias dèbiles, faghende promotzione a sa cultura, a sa letura e a s’autonomia, ammodernende sa biblioteca comente logu in ue istare paris, in ue connòschere gente diversa e in ue si megiorare”.
(GF.P.)
