A movi de su dexi de onnissanti de su 2024, po dexi domìnigus a is noioras de merì in Catalan Tv, partit su programma Binu de Sardigna, cun Salvatore Taras e Maria Giovanna Cherchi. S'at a fueddai de cantinas, variedadis de binu, bingialis e produsidoris e finas de tecnologia e promotzioni.
In su primu atòbiu s'at a fueddai de sa bidda de Sennori e de su muscadeddu cun Michele Soggia, chi at a rapresentai sa Cunfraria de su Muscadeddu Sorso-Sennori, unu assòtziu de produsidoris, amantiosus de binu, gustadoris e amigus chi in is ùrtimus annus ant traballau meda po avalorai custu bingiali.
A pustis de s'atòbiu cun s'assòtziu s'at a abbisitai sa cantina de Giorgio Fara chi fait parti de s'assòtziu. Maria Giovanna Cherchi at a intervistai Angela Pazzola, filla de su poeta mannu sennoresu, chi at a fueddai de sa stòria e de sa cultura de su territòriu.
In ònnia puntada est previdida una anàlisi organolètica e sensoriali in sardu, de su binu protagonista, fata de su crìticu enogastronòmicu Gilberto Arru, coordinadori regionali de sa ghia Vinibuoni de Itàlia.
Custa faina est cuncordada cun s'agiudu econòmicu de sa RAS, Bandu Imprentas 2023-24, LR 22/2018, art. 22.
Àterus atòbius cun “Binu de Sardigna” sunt prevididus po su 17 de onnisanti in sa Cantina Gostolai di Oliena e po su 24 de onnisanti in Codrongianos.
