Su Comune de Aristanis nd’istudat sos monumentos comunale prus importantes pro pònnere in evidèntzia chi sas bulletas sunt incaridas meda.
“Dae custu sero, cun dispraghere mannu, nd’amus a istudare sas lughes de sa màgine de Lionora in Pratza de Citadi, sas lughes de su Palatzu de sos Iscolòpios, sas de sos muros antigos e sas de s’Hospitalis Sancti Antoni – at annuntziadu su sìndigu Massimiliano Sanna su 21 de custu mese -. Sas bulletas sunt incaridas meda pro totus: tzitadinos, impresas e finas comunes. Totus devimus fàghere sos contos cun custas ispesas chi faghent dannu a sos bilàntzios”.
“A nd’istudare s’illuminatzione de sos monumentos no annullat su problema, e nois l’ischimus – sighit su sìndigu Sanna -. Però cherimus dare unu signale e educare a su rispàrmiu s’opinione pùblica, màssimu como chi nd’est intrende un’ierru chi cumparet dificultosu meda ca totu sa cosa est incarida, finas su riscaldamentu e sas bulletas de sa lughe”.
A su matessi tempus, su Comune est ponende in atu una sèrie de atziones pro limitare sos consumos: b’at una gara de apaltu pro gestire su servìtziu nou de illuminatzione pùblica chi previdet rispàrmios mannos e, ispetantis, in sas domos chi apartenent a su Comune totu sas lughes las sunt cambiende cun àteras a led, chi faghent minimare su consumu finas de su 60%.
(GF.P.)