Su Comunu de Crabas, Servìtziu Àrea Marina Proteta, at aprovau s'avisu po achiriri istàntzias de autorizatzioni a s'ormègiu in su campu boas assentau in s'àrea de Mari Mortu in Santuanni.
S'ant a podi assinnai finas a non prus de 92 postus de ormègiu sighendi sa graduatòria apustis de ai arriciu is istàntzias, onniuna de custas at a depi ponni in contu un'unidadi nàutica sceti.
Podint intregai istàntzia de autorizatzioni a s'ormègiu is meris o is chi tenint àteru tìtulu legali chi abilitat a impreai unidadi nàutica po chi si ndi pedit s'autorizatzioni.
Is istàntzias de autorizatzioni s'ant a depi sterri segundu a su modellu Allegau 1 chi si podit iscarrigai de su giassu istitutzionali de su Comunu de Crabas, o pigai de is ufìtzius AMP, aunendi a cussu còpia de documentu de identidadi bàllidu.
S'istàntzia de autorizatzioni si depit trasmiti movendi de sa ora de is 10:00 de mangianu de su 22 de maju de su 2024 e aintru de is 5 de merii de su 30 de maju de su 2024, a posta eletrònica certificada o a posta eletrònica ordinària, o intregada a manu a s'Ufìtziu Protocollu.
Po ndi sciri de prus tocat a ligi s'avisu chi est in s'albu pretòriu de su Comunu de Crabas.
